Մայիսի 03-05-ը ՀԱՊՀ Վանաձորի մասնաճյուղում տեղի ունեցավ արդեն ավանդույթ դարձած ուսանողական տարեկան գիտաժողով, որը նվիրված էր Հայոց բանակի կազմավորման 25-ամյակին: Ներկայացվեց 83 ելույթ: Ողջույնի խոսքով հանդես եկավ մասնաճյուղի տնօրեն Արմեն Խառատյանը նշելով՝ պատահական չէ, որ գիտաժողովը նվիրված է Հայոց բանակի կազմավորման 25-ամյակին: Մասնաճյուղի 20 ուսանողներ ծառայել են սահմանային դիրքերում, մասնակցել ապրիլյան քառօրյա պատերազմին՝ հերոսաբար պաշտպանելով մեր հայրենիքը: Իսկապես անգնահատելի են մեր զինվորների քաջագործությունները: Գիտաժողովի մասնակիցները ծափողջյուններով մեծարեցին և հարգանքի տուրք մատուցեցին մերօրյա հերոս պոլիտեխնիկցիներին:
Գիտաժողովի առաջին լիագումար նիստին ներկայացվեց 3 ելույթ.
- Վանիչկա Ղազարյան. «Ղարաբաղյան քառօրյա պատերազմը. նոր սերունդ, նոր հերոսներ»: Ներկայացվեց քառօրյա պատերազմում տեղի ունեցած դեպքերը, հայ զինվորների անկոտրում պայքարը, ինչպես նաև այն 20 ուսանողների անունները, ովքեր հերոսաբար մասնակցել են քառօրյա պատերազմին: Պոլիտեխնիկն անմասն չի մնացել այդ գործին՝ փորձելով հնարավորինս օգնության հասնել սահմանում գտնվող հայ զինվորին:
- Էդիտա Հովհաննիսյան, Անժելա Հովհաննիսյան, Աստղիկ Միքայելյան. «Լոռու մարզի գյուղտեխնիկայի վարձակալության և սպասարկման կայանների ստեղծման ծրագիր»: Վանաձորի «ՉԻՆՎԱՆ» ՍՊԸ-ն առաջ է քաշել մի գաղափար, որի նպատակն է Լոռու մարզում թիրախային 3 շրջաններում հիմնել գյուղտեխնիկայի վարձակալության և սպասարկման կայաններ, որոնք հնարավորություն կտան ֆերմերներին գյուղատնտեսական աշխատանքներն իրականացնել օգտագործելով համապատասխան գյուղտեխնիկա: Վանաձորի «ՉԻՆՎԱՆ» ՍՊԸ-ն հիմք ունենալով Հայաստանի ազգային պոլիտեխնիկական համալսարանի Վանաձորի մասնաճյուղի հետ անցած տարիների համագործակցության փորձը, առաջարկեց մասնաճյուղին մասնակցելու նախագծի իրականացման աշխատանքներին: Ստացված տվյալների հիման վրա ընտրված տարածաշրջանների համար` կախված ցանքատարածություններից և մշակաբույսերի առանձնահատկություններից, կատարվել է համապատասխան սարքավորումների ընտրություն, որոնք կնպաստեն գյուղատնտեսական աշխատանքների մեքենայացմանը և գյուղատնտեսական աշխատանքները կդարձնեն ավելի արդյունավետ: Ներկայումս նախագիծը ներկայացված է «Innovation Matching Grants» դրամաշնորհային ծրագրի շրջանակներում` ֆինանսավորում ստանալու համար Աշխատանքային խմբի կողմից մշակված բիզնես պլանը գտնվում է գյուղնախարարությունում, այն քննարկման փուլում է: ՀԱՊՀ Վանաձորի մասնաճյուղի համապատասխան մասնագիտական կրթություն ստացած շրջանավարտների համար մեքենատրակտորային կայաններում աշխատելու հնարավորություն կստեղծվի:
- Մարգարիտա Մարուքյան. «Նոր մոտեցումներ աղացների մանրացնող բեռնվածքի դինամիկական պարամետրերի որոշման ուղղությամբ»: Ուսումնասիրվել է ռադիոազդանշանային եղանակների կիրառմամբ թրթռաղացներում մանրացնող մարմինների և մանրացվող նյութի բարդ ցիրկուլյացիոն շարժման օրինաչափությունների և մանրացնող մարմինների դինամիկական պարամետրերի մասին ինֆորմացիան, ինչը թույլ կտա ինտենսիֆիկացնել և բարելավել նյութերի մանրացման գործընթացը: Այս ուղղությամբ զգալի աշխատանքներ են կատարվել նաև մեր մասնաճյուղի «Տրանսպորտային համակարգեր» ամբիոնի աշխատակիցների կողմից: Մի շարք հավասարումներ և կախվածություններ են ստացվել, որոնք ընդլայնել են թրթռաղացների կիրառման շրջանակները, նախագծել, պատրաստել և ներդնել դրանք մի շարք ձեռնարկություններում, այդ թվում նաև Վանաձորի «ԳԻՊԿ» ՓԲԸ-ում և Ռուսաստանի Դաշնության Կալուգա քաղաքի «Տաշիր» ընկերությունների խմբի ձեռնարկությունում:
Մասնաճյուղի տնօրեն Արմեն Խառատյանը կարևորում է նման գիտաժողովների անցկացումը և´ բակալավրիատի, և´ մագիստրատուրայի ուսանողների համար, քանի որ դրանք կօգնեն հետագայում գիտահետազոտական աշխատանքներ կատարել, կնպաստեն, որ բուհի շրջանավարտները դառնան ստեղծագործող ճարտարագետներ:
Լավագույն աշխատանքների հեղինակները կխրախուսվեն: Միաժամանակ որոշվեց լրամշակումից հետո որոշ աշխատանքներ ներկայացնել տպագրության:
«Ինգո Արմենիա» ապահովագրական ընկերության Լոռու մարզի պատասխանատու Արման Աքուլյանը Երևանի իր գործընկերների հետ հանդիպում ունեցավ ՀԱՊՀ Վանաձորի մասնաճյուղի ուսանողների հետ: Հանդիպման ընթացքում ներկայացվեց պրեզենտացիա՝ «Ապահովագրություն, ապահովագրական գործակալ» թեմայով: Ուսանողները մանրամասն տեղեկացան ապահովագրական ընկերությունների, մատուցվող ծառայությունների և այլ հետաքրքիր փաստերի մասին: Հանդիպման նպատակն էր ուսանողներին ծանոթացնել գործակալի գործառույթների մասին, ինչպես նաև՝ համաձայնության դեպքում, ընդգրկել վերջիններիս ապահովագրական աշխատանքների մեջ: Խոսվեց նաև «Ինգո Արմենիա»-ի ապահովագրական դպրոցում անվճար սովորելու հնարավորության մասին:
Ուսանողներն իրենց հետաքրքրող հարցերն ուղղեցին ապահովագրական ընկերության ներկայացուցիչներին, ովքեր հանգամանորեն պատասխանեցին նրանց բոլոր հարցերին:
Ուսանողներից շատերը համաձայնեցին ընդգրկվել գործակալի ծավալած աշխատանքներում և իրենց առաջին քայլերն անել՝ գումար վաստակելու համար:
ՀԱՊՀ Վանաձորի մասնաճյուղում տեղի ունեցավ «Էլի հայ ունենք» խորագրով միջոցառում՝ նվիրված Հայոց Մեծ Եղեռնի 102-րդ տարելիցին: Միջոցառումը կազմակերպել էր մասնաճյուղի ավագ դպրոցի ֆիզիկայի ուսուցչուհի Լուսինե Սարգսյանը, ով իր խոսքում նշեց.
-Այո՛, ցավով ենք հիշում, սակայն չենք մոռանում, որ այսօր, դարաշրջանի մարտահրավերներին դիմակայելու համար անհրաժեշտ է մաքրել արցունքները, անհրաժեշտ է, ոչ թե խնդրել, ոչ թե աղաչել, այլ բողոքի ձայն բարձրացնել, բարձրաձայնել մեր պահանջը, լինել հետևողական և համառ: Միջոցառման անվանումը «էլի հայ ունենք» պատահական չէ: Եվ այսօր, որպես մի հայ մարդ, ցանկանում եմ գալիք սերնդի մեջ ամրապնդել պահանջատիրոջ հոգեբանությունը, այլ ոչ կոտորվածի:
Աշակերտները ոչ միայն հիշեցին և հարգեցին 1915 թվականի անմեղ նահատակների հիշատակը, այլև ևս մեկ անգամ ի լուր աշխարհի լսելի դարձրին իրենց հոգու ճիչը: Եվ վստահ էին, որ յուրաքանչյուր հայի պահանջը կստիպի վերջապես ընդունել Հայոց Մեծ Եղեռնի միջազգային ճանաչումը և պատմական Հայաստանի վերամիավորումը: Դասղեկը և աշակերտները նկարահանել էին տեսաֆիլմ՝ Հայոց ցեղասպանության զոհերի հուշահամալիրում՝ Ծիծեռնակաբերդում, որտեղ ծաղիկներ դրեցին և իրենց սրտի խոսքն ասացին զոհերի հիշատակին:
Վերջում մասնաճյուղի տնօրեն Արմեն Խառատյանը շնորհակալություն հայտնեց միջոցառումը կազմակերպելու, աշակերտների մեջ հայեցի հոգեբանություն սերմանելու և մեր պատմությունը սերնդեսերունդ փոխանցելու համար:
Հայաստանի ազգային պոլիտեխնիկական համալսարանի Վանաձորի մասնաճյուղում տեղի ունեցավ «Կրթության ժամանակն է» խորագրով աշխատաժողով, որը կազմակերպվել էր Էրազմուս+ բարձրագույն կրթության բարեփոխումների փորձագետների կողմից: «Կրթության ժամանակն է» աշխատաժողովը վարում էր Էրազմուս+ բարձրագույն կրթության բարեփոխումների փորձագետ Մերի Հայրապետյանը: Ուսանողները խմբային խաղերի և ակտիվ քննարկումների միջոցով անդրադաձան ժամանակի արդյունավետ կառավարմանը։ Քննարկվեցին հետևյալ հարցերը. ժամանակի արդյունավետ կառավարման հիմնարար հասկացություններ, հասանելի նպատակների սահմանում կոնկրետ ժամանակահատվածի համար, կարևոր և երկրորդային նպատակների տարբերակում ուսումնառության ընթացքում, կիսամյակի կտրվածքով ժամանակացույցի ձևավորում, շաբաթական և օրական ժամանակացույցի կազմում, ժամանակի արդյունավետ կառավարման խոչընդոտները, ժամանակի կառավարման արդյունավետության բարձրացմանն ուղղված ռազմավարություններ:
Էրազմուս+ փորձագետների թիմը փորձագիտական խորհրդատվություն է տրամադրում նաև դասավանդման, ուսումնառության և գնահատման մեթոդաբանության, կրթության որակի ապահովման, ուսումնառության արդյունքների փոխճանաչման և բարձրագույն կրթության արդիականացման այլ ուղղությունների շուրջ։ Փորձագետները տպավորված էին Պոլիտեխնիկի ուսանողների ստեղծագործական և նորարական մտածելակերպով, տրամաբանությամբ և արագ կողմնորոշվելու, ինչպես նաև խնդիրներ վեր հանելու և ճիշտ լուծումներ տալու ունակությամբ: Փորձագետները նշեցին, որ հագեցած, ակտիվ և դրական լիցքերով լի օր են ունեցել Հայաստանի ազգային պոլիտեխնիկական համալսարանի Վանաձորի մասնաճյուղում:
Ապրիլի 20-ին Հայաստանի ազգային պոլիտեխնիկական համալսարանի Վանաձորի մասնաճյուղում անցկացվեց «Բաց դռների օր»: Հանդիպման նպատակը ապագա դիմորդների մասնագիտական կողմնորոշումն էր: Արդեն ավանդույթ է դարձել հյուրընկալել տարբեր դպրոցների աշակերտներին: Այս անգամ մեր հյուրն էին Վանաձորի 11-րդ ավագ դպրոցի աշակերտները:
Նրանք իրենց ուսուցիչների ուղեկցությամբ այցելեցին ճարտարագիտական լաբորատորիաներ, որոնք հիմնականում նախատեսված են ՀԱՊՀ-ի ուսանողների լաբորատոր և գիտահետազոտական աշխատանքների կատարման համար:
Մասնակցեցին մասնաճյուղի դասախոս Շավարշ Ոսկանյանի կողմից անցկացվող ֆիզիկայի ընդհանրական դասին և ծանոթացան ժամանակակից սարքավորումներին: Մասնաճյուղի ավագ դպրոցի ուսուցչուհի Արաքսյա Բալյանը ռոբոտաշինության լաբորատորիայում աշակերտներին տեղեկություններ հայտնեց ռոբոտների, ռոբոտաշինության խմբակի աշակերտների նվաճումների և մրցանակների մասին: Այնուհետև նրանք ականատես եղան ռոբոտների կատարած աշխատանքներին: Ապագա մասնագիտության ընտրության հարցում աշակերտներին իրենց ելույթներով օգնեցին «Շինարարություն և լեռնային գործ» ամբիոնի վարիչ, ընդունելության պատասխանատու քարտուղար Աշոտ Գյուրջինյանը, արտաքին կապերի պատասխանատու Տաթևիկ Մարգարյանը:
ՀԱՊՀ Վանաձորի մասնաճյուղի տնօրեն Արմեն Խառատյանի հետ հանդիպման ընթացքում խոսվեց Պոլիտեխնիկի ձեռքբերումների, ինժեներական և տեխնոլոգիական կրթության կարևորության և արդիականության մասին: «Թեթև արդյունաբերության ճարտարագիտություն և քիմիական տեխնոլոգիաներ» ամբիոնի վարիչ Ալբերինա Գալստյանը կատարեց քիմիական փորձեր և անցկացրեց ինտերակտիվ քննարկում: Աշակերտները դիտեցին նաև Պոլիտեխնիկի մասին պատմող տեսաֆիլմ: Տեսաֆիլմի դիտումից հետո աշակերտները ճեմասրահում ուսումնասիրեցին Պոլիտեխնիկի պատմությանը վերաբերող պաստառները: Հանդիպեցին նաև ամբիոնների վարիչների, դասախոսների հետ՝ նրանց ուղղելով իրենց հետաքրքրող հարցերը:
Ապրիլի 13-ին Հայաստանի ազգային պոլիտեխնիկական համալսարանի Վանաձորի մասնաճյուղում՝ ESPAQ Tempus նախագծի շրջանակներում մեկնարկվեց ուսանողական աշխատաժողով: Հայաստանի ուսանողական ազգային ասոցիացիան ապրիլի 10-13-ը Հայաստանում հյուրընկալել է 16 ուսանողների ԵՄ երկրներից և Շոտլանդիայից: Աշխատաժողովներ են անցկացվել Հայաստանի ամերիկյան համալսարանում, Հայաստանի պետական տնտեսագիտական համալսարանում, Երևանի գեղարվեստի պետական ակադեմիայում: Մայրաքաղաքի երեք բուհերից հետո մարզային միակ աշխատաժողովը տեղի ունեցավ ՀԱՊՀ Վանաձորի մասնաճյուղում:
ESPAQ ծրագրի հիմնական նպատակը ՀՀ-ում բարձրագույն կրթության որակի ապահովման գործընթացներում ուսանողների ներգրավման բարձրացումն է: Այս փուլում իրականացվում է ուսանողների փոխանակումներ Եվրոպական ուսանողական միության և Հայաստանի ուսանողական ազգային ասոցիացիայի միջև: Ծրագրի նպատակն է նաև ստեղծել փորձի փոխանակման հարթակ, որտեղ ուսանողները կձևավորեն որակի ապահովման վերաբերյալ իրենց տեսակետները և կզարգացնեն որակի ապահովման գործընթացներում ուսանողների ներգրավման վերաբերյալ հմտություններ: Հյուրերին ողջունեց մասնաճյուղի տնօրեն Արմեն Խառատյանը: Այնուհետև Հայաստանի ուսանողական ազգային ասոցիացիայի փոխտնօրեն Սարգիս Աստարյանցը ներկայացրեց ծրագիրը և նպատակները, նշելով, որ հիմնական նպատակն է մասնակիցներին տալ պատկերացումներ ՀՀ-ում ընթացող որակի ապահովման գործընթացների մասին, ինտերակտիվ մեթոդներով մասնակիցների մոտ ձևավորել որակի ապահովման գործընթացներում մասնակցելու անհրաժեշտ կարողություններ: Հայաստանի ուսանողական ազգային ասոցիացիայի ներկայացու
ցիչ Գոհար Հովհաննիսյանը ներկայացրեց ՀՈԻԱԱ-ի փորձը որակի ապահովման գործընթացներում:
Իռլանդիայի, Շոտլանդիայի, Լիտվայի, Լեհաստանի ներկայացուցիչները նույնպես մեր ուսանողների հետ կիսվեցին իրենց փորձով: Այնուհետև կազմակերպվեց խմբային աշխատանք, որում ակտիվ մասնակցություն ունեցան Վանաձորի մասնաճյուղի ուսանողները:
Սարգիս Ասատրյանցը, հյուրերը իրենց գոհունակությունը հայտնեցին Վանաձորի մասնաճյուղում կազմակերպված աշխատաժողովի վերաբերյալ, կարևորեցին տարածաշրջանում նման հանդիպումների կազմակերպումը և ուսանողների ընդգրկվածությունը բարձրագույն կրթության որակի ապահովման գործընթացում: Վերջում կազմակերպվեց հյուրերի շրջայց Վանաձորի տեխնոլոգիական կենտրոն:
«Դասավանդի´ր, Հայաստան» կրթական հիմնադրամն անչափ կարևորում է համագործակությունը Հայաստանի բոլոր բուհերի եւ կրթական հաստատությունների հետ։ Գործունեության մի քանի տարիների ընթացքում հիմնադրամը սերտ աշխատել է տարբեր բուհերի հետ, կազմակերպել ֆոկուս խմբեր, մասնակցել ներբուհական աշխատանքային տոնավաճառներին, փորձել առավելագույնս ներգրավված լինել բոլոր միջոցառումներում։ Բուհերը, որոնց հետ հիմնադրամն սերտ աշխատել է, նախ դարձել են գործընկեր, ապա ընկեր, իսկ այժմ խորացնում են այդ համագործակցությունը՝ ստորագրելով համագործակցության հուշագրեր։
Մարտի 15-ը նշանավորվեց ևս մեկ ստորագրված համաձայնագրով։ Այս անգամ կնքվեց համաձայնագիր Հայաստանի ազգային պոլիտեխնիկական համալսարանի (ՀԱՊՀ) Վանաձորի մասնաճյուղի հետ։ Համաձայնագիրը ստորագրվեց «Դասավանդի´ր, Հայաստան»-ի հավաքագրման և ընտրության տնօրեն Թենի Ավագյանի ու ՀԱՊՀ-ի Վանաձորի մասնաճյուղի տնօրեն Արմեն Խառատյանի կողմից։
Ստորագրման արարողությունից հետո նույն համալսարանում կազմակերպվել էր պրեզենտացիա, որի նպատակն էր ուսանողներին ներկայացնել մեր ծրագիրը, դրա մանրամասներն ու առավելությունները։ Մենք շատ ոգևորված ենք, որ Վանաձորի շրջանավարտների ու ուսանողների շրջանում այդքան հետաքրություն է առաջացնում մեր ծրագիրը, եւ մեծ է մասնակցության ցանկությունը։ Բոլորին կոչ ենք անում դիմելու, քանի որ հայտադիմումների ընդուման երրորդ վերջնաժամկետին մնացել են հաշված օրեր։
Հայաստանի ազգային պոլիտեխնիկական համալսարանի Վանաձորի մասնաճյուղի ավագ դպրոցի աշակերտները կազմակերպել էին գեղեցիկ միջոցառում՝ նվիրված մայրերի տոնին: Միջոցառումը նախաձեռնել էր ՀԱՊՀ Վանաձորի մասնաճյուղի ավագ դպրոցի ուսումնադաստիարակչական գծով փոխտնօրեն Հասմիկ Հովհաննիսյանը՝ նշելով, որ նմանատիպ միջոցառումները աշակերտների մոտ ձևավորում են գեղագիտական ճաշակ և զարգացնում են նրանց ստեղծագործական միտքը: Միջոցառման ընթացքում աշակերտները ցուցադրեցին իրենց ունակությունները ասմունքի, երգի, պարի բնագավառներում, ինչպես նաև՝ ցուցադրեցին կախարդական գեղեցիկ հնարքներ: 
Գարնանային օրերն ավելի են իմաստավորվում և շունչ առնում, երբ դրանք ասոցացնում ենք կնոջ, քրոջ և մայրիկի հետ, քանզի մեզ կյանք պարգևողները և այն գունեղ դարձնողները հենց մեր մայրերն են: Այս միջոցառման առանցքում ևս մայրն էր՝ իր ողջ քնքշությամբ և հմայքով: Աշակերտները իրենց սրտառուչ խոսքերը մայրերին ձոնելուց հետո նրանց նվիրեցին ծաղիկներ, ժպիտներ և գեղեցիկ հույզեր պարգևեցին իրենց մայրերին: Ուսուցիչները ևս արժանացան հարգանքի, քանզի նրանք նույնպես համարվում են կրթող և դաստիարակող մայրեր:
Միջոցառմանը հյուրընկալվել էին այլ դպրոցների աշակերտներ, ուսուցիչներ և փոխտնօրեններ, ովքեր իրենց երախտիքի խոսքն ասացին 10-րդ «ա» դասարանի դասղեկ Հասմիկ Հովհաննիսյանին՝ գեղեցիկ միջոցառումը կազմակերպելու համար:
Պոլիտեխնիկն ունի ոչ միայն ինժեներական և տեխնոլոգիական մտածողության կարողություն, այլև գեղագիտական և նրբաճաշակ վերաբերմունքի դրսևորում գեղեցիկի նկատմամբ:
Մարտի երկուսին, ավագ դպրոցների հետ համագործակցության պայմանագրի շրջանակներում, Վանաձորի թիվ 11 դպրոցի աշակերտները ֆիզիկա առարկայի ուսուցչուհի Արմանուշ Դիլբարյանի և ինֆորմատիկա առարկայի ուսուցչուհի Վարդուհի Պետրոսյանի ուղեկցությամբ այցելեցին ՀԱՊՀ Վանաձորի մասնաճյուղ: Աշակերտներն այցելեցին ճարտարագիտական լաբորատորիաներ, որոնք հիմնականում նախատեսված են ՀԱՊՀ-ի ուսանողների լաբորատոր և գիտահետազոտական աշխատանքների կատարման համար: Մասնակցեցին մասնաճյուղի դասախոս Շավարշ Ոսկանյանի կողմից անցկացվող ֆիզիկայի ընդհանրական դասին և ծանոթացան ժամանակակից սարքավորումներին: Նրանք առանձնապես տպավորված էին ճշգրիտ փորձարկումների, ռոբոտաշինության, հեռահաղորդակցման և սարքավորումներով հագեցած լաբորատորիաներով:
Մասնաճյուղի ավագ դպրոցի ուսուցչուհի Արաքսյա Բալյանը ռոբոտաշինության լաբորատորիայում աշակերտներին տեղեկություններ հայտնեց ռոբոտների, ռոբոտաշինության խմբակի աշակերտների նվաճումների և մրցանակների մասին: Այնուհետև նրանք ականատես եղան ռոբոտների կատարած աշխատանքներին: Մասնագիտական կողմնորոշման նպատակով արտաքին կապերի համակարգող Տաթևիկ Մարգարյանը աշակերտներին ներկայացրեց մասնաճյուղում գործող մասնագիտությունների ցանկը, խոսեց ակտիվ գործընկերային կապի մասին, Պոլիտեխնիկի շրջանավարտների ձեռքբերումների և հանրության շրջանում ունեցած իմիջի մասին: Աշակերտները ծանոթացան նաև ՀԱՊՀ Վանաձորի մասնաճյուղի տնօրեն Արմեն Խառատյանի հետ, ով խոսեց ինժեներական և տեխնոլոգիական կրթության կարևորության և արդիականության մասին: Նման հանդիպումները ողջունելի են, քանի որ դրանք խթանում են բուհ-դպրոց համագործակցությանը:
Փետրվարի 2-ին Հայաստանի ազգային պոլիտեխնիկական համալսարանի Վանաձորի մասնաճյուղի ավագ դպրոցի X բ դասարանը՝ դասղեկ Լուսինե Սարգսյանի օգնությամբ կազմակերպել էին «Ի՞նչ, որտե՞ղ, ե՞րբ» ինտելեկտուալ խաղ-մրցույթ: Միջոցառման նպատակն էր խթանել աշակերտների տրամաբանական մտածողությունը, հետաքրքրություն առաջացնել ինտելեկտուալ խաղերի նկատմամբ: Չնայած դպրոցը ֆիզմաթ ուղղվածություն ունի, հարցերը տարաբնույթ բովանդակություն ունեին: Աշակերտները կարողոցան դրսևորել իրենց գիտելիքները՝ պատասխանելով տարբեր բնագավառներից հնչած հարցերին: Ակտիվ խաղափուլերից հետո ԳԻՏԱԿՆԵՐ և ՀԱՆԴԻՍԱՏԵՍ պայքարում հաղթեցին ԳԻՏԱԿՆԵՐԸ: Բոլոր մասնակիցները տնօրինության կողմից պարգևատրվեցին պատվոգրերով:
Հուսով ենք՝ նմանատիպ նախաձեռնությունը լավ սկիզբ կլինի այլ հետաքրքիր միջոցառումների համար, որոնց շնորհիվ աշակերտների առօրյան կդառնա ավելի հետաքրքիր և բովանդակալից:
