ՀՊՃՀ Վանաձորի մասնաճյուղի հենակետային վարժարանը հիմնադրվել է 1996թ.-ին կրթահամալիրի գիտխորհրդի որոշմամբ: Առաջին տնօրենը Մ. Մ. Սիմոնյանն էր: 1997-1998 թթ. տնօրեն է նշանակվել տ. գ. թ., դոցենտ Ա. Գ. Խառատյանը: 2009-2010 թթ.-ից տնօրենի պաշտոնակատար է նշանակվել Ա. Հ. Սիրադեղյանը: Նա պաշտոնավարել է մինչև 2018թ. նոյեմբեր ամիսը: Հիմա ավագ դպրոցի տնօրենն է Լուսինե Սարգսյանը:
Վարժարանի հիմնադրման առաջին իսկ օրվանից այստեղ դասավանդում են բանիմաց և փորձառու ուսուցիչներ, գիտությունների դոկտոր, գիտությունների թեկնածուներ, դասախոսներ: Հիմք ընդունելով ՀՀ Կառավարության 2011 թ. հուլիսի 7-ի թիվ 942-Ն որոշումը և ՀՊՃՀ սեպտեմբերի 08-ի թիվ 01-03/408 հրամանը՝ «ՀՊՃՀ Վանաձորի մասնաճյուղի հենակետային վաժարան» նախկին ՊՈԱԿ-ի ներքոհիշյալ աշխատակազմը սեպտեմբերի 1-ից տեղափոխման կարգով ներառել ՀՊՃՀ-ի (Պոլիտեխնիկ) նոր ձևավորված Վանաձորի մասնաճյուղի ավագ դպրոց կառուցվածքային ստորաբաժանման մեջ: Ավագ դպրոցն ունի բնագիտամաթեմատիկական հոսք՝ ֆիզմաթ ենթահոսք (մաթեմատիկայի և ֆիզիկայի խորացված ուսուցմամբ), ինժեներական ենթահոսք (մաթեմատիկայի, ֆիզիկայի և գծագրության խորացված ուսուցմամբ) և տնտեսագիտության ենթահոսք :
1996 թ.-ից մինչ այսօր վարժարանը տվել է 1200-ից ավելի շրջանավարտ, որոնց 97 տոկոսից ավելին հենց նույն տարին ընդունվել է Հայաստանի Հանրապետության պետական բուհեր, իսկ նրանց գերակշռող մասը՝ Հայաստանի ազգային պոլիտեխնիկական համալսարան: Ավագ դպրոցի դասերն անցկացվում են հիմնանորոգված մասնաշենքում, օգտագործվում են նաև համալսարանի լաբորատորիաները: Ավագ դպրոցում գործում է Արմաթ ինժեներական լաբորատորիա: Ավագ դպրոցում ուսուցումն անվճար է:
Ավագ դպրոցի հաջողությունների հայելին, նրա գլխավոր այցեքարտը շրջանավարտներն են: Նրանց գերակշռող մասը համալսարանի գերազանցիկ ուսանողներն են, ավագները, ակտիվիստները, ուսխորհրդի անդամները, ապագա մագիստրոսներն ու ասպիրանտները:
5 շրջանավարտ փայլուն կերպով պաշտպանել է ատենախոսություն` ստանալով գիտությունների թեկնածուի գիտական աստիճան: Շրջանավարտներից շատերը հետագայում ուսումը շարունակել են մագիստրատուրայում` ոչ միայն Հայաստանի Հանրապետությունում, այլև Գերմանիայի, Շվեդիայի, Իսպանիայի բարձրակարգ համալսարաններում: 