Հայաստանի ազգային պոլիտեխնիկական համալսարանի Վանաձորի մասնաճյուղում՝ Հայ Օգնության Ֆոնդի աջակցությամբ, մասնավորապես՝ ամերիկահայ բարերարներ Արա և Վալերի Չերչյանների ֆինանսական ներդրումների շնորհիվ բացվեց Խորը Ինժեներական Կրթական Լաբորատորիա։
Խորը ինժեներական կրթական ծրագիրը մեկնարկել է 2021 թ. փետրվարից ՀԱՊՀ Գյումրու մասնաճյուղում՝ Հայ կրթական հիմնարկության աջակցությամբ և ֆինանսավորմամբ։
ՀԱՊՀ Վանաձորի մասնաճյուղում հիմնովին վերանորոգվել և համակարգչային ու ինժեներական սարքավորումներով է կահավորվել առանձին լսարան։
Ծրագիրը հնարավորություն է տալիս Լոռու մարզի ավագ դպրոցի աշակերտներին ստանալ խորը գիտելիքներ արհեստական բանականության և ճարտարագիտության ոլորտներում։ Այստեղ դասավանդում են ոլորտի փորձառու մասնագետները: Ստացած գիտելիքների շնորհիվ մասնակիցները նախագծում և ստեղծում են խելացի լուծումներ և արտադրանքներ:
Նոր լաբորատորիայի բացմանը ներկա էին ՀԱՊՀ ռեկտոր Գոռ Վարդանյանը, պրոռեկտորներ Էլբակ Էլբակյանը, Կարապետ Թոռչյանը, աշխատակազմի ղեկավար Գևորգ Հարությունյանը և ՀԱՊՀ այլ ներկայացուցիչներ։
Պարոն Վարդանյանը նշեց, որ բարձրագույն կրթության հաջողությունները պայմանավորված են հանրակրթության արդյունքում ձևավորված պոտենցիալից։ Կասկած չկա, որ այս լաբորատորիան նախորդների պես ևս հնարավորություն է տալու աշակերտներին զարգացնել նոր հմտություններ թե՛ նախագծման, թե՛ ծրագրավորման ասպարեզներում։ Պոլիտեխնիկի ռեկտորը կարևորում է այն փաստը, որ Հայաստանի մարզերում համաչափ զարգանա ինժեներական կրթությունը։
Մասնաճյուղի տնօրեն պարոն Խառատյանը շնորհավորեց Մասնաճյուղին՝ նման լավ հնարավորություն ձեռք բերելու առիթով, շնորհակալություն հայտնեց ամերիկահայ բարերարներին և ԳՏՏԿ-ին նմանօրինակ լաբորատորիայի ստեղծման համար։ Նա վստահ է, որ մեր աշակերտները և ուսանողները լավագույնս կօգտագործեն իրենց տրված հնարավորությունները՝ ի նպաստ երկրի զարգացման։
Ներկաներին ողջունեց և շնորհավորեց նաև ավագ դպրոցի տնօրեն Լուսինե Սարգսյանը։ Նշեց, որ լաբորատորիայի ներդրումը ավելի կխորացնի ավագ դպրոց և բուհ համագործակցությունը
ԳՏՏԿ գործադիր տնօրեն Ամալյա Եղոյանը նշեց, որ սա 3-րդ ինժեներական լաբորատորիան է՝ Գյումրիից ու Փարաքարից հետո: Կարևորն այն է, որ
աշակերտները մեծ խանդավառությամբ են մասնակցում ծրագրին, համադրում են ծրագրավորման և ինժեներական գիտելիքներն ու թիմային աշխատանքի արդյունքում նախագծում խելացի պրոդուկտներ։
Ծրագրի տևողությունը 2 տարի է՝ նախատեսված ավագ դպրոցի աշակերտների համար։
Մասնաճյուղի և ավագ դպրոցի սաներն իրենց երաժշտական կատարումներով գեղեցկացրին տոնական միջոցառումը։
Վերջում պարոն Վարդանյանը և Պոլիտեխնիկի ներկայացուցիչները շրջայց կատարեցին Մասնաճյուղի Արմաթն օդում աշխատանոցով, այցելեցին նաև ավագ դպրոցի դասարաններ, որտեղ մեծ տպավորություն ստացան աշակերտների կողմից ստեղծված ամանորյա գեղեցիկ միջավայրից։