ՀԱՊՀ Վանաձորի մասնաճյուղի ավագ դպրոցի տնտեսագիտական հոսքի 11 գ դասարանի աշակերտները՝ տնտեսագիտության ուսուցչուհի Արուսյակ Մադոյանի ղեկավարությամբ, ներկայացրել են նախագծային աշխատանք «Ձեռնարկության ներքին և արտաքին միջավայրի ուսումնասիրությունը» թեմայով։ Թեմայի արդիականությունը հիմնավորված է այն հանգամանքով, որ երկրի տնտեսության զարգացման կարևորագույն գործոնը արդյունաբերության զարգացումն է, իսկ Հայաստանի նման փոքր և ոչ բարենպաստ տարածաշրջանում տեղակայված երկրի համար սա առավել քան ակտուալ է։ Հետազոտությունը կատարվել է Գլորիա կարի ֆաբրիկայի օրինակի հիման վրա։ Աշակերտները այցելել են գործարան, իրենց աչքով տեսել են արտադրական պրոցեսը, ծանոթացել ձեռնարկության կառուցվածքին, կառավարմանը, առկա խնդիրներին, կատարել են վանաձորյան շուկայի ուսումնասիրություն և առաջարկում են նոր, ազգային բրենդի շուկա մուտք գործելու ռազմավարական ծրագիր։ Նախագծային աշխատանքի նպատակն էր տեսական գիտելիքները գործնականում կիրառելու միջոցով աշակերտների մոտ զարգացնել հետազոտելու, վերլուծելու ունակությունը, թիմային աշխատանքը և փոխօգնությունը։
Նախագծային աշխատանքի ներկայացմանը ներկա էին ՀԱՊՀ Վանաձորի մասնաճյուղի տնօրեն Արմեն Խառատյանը, ավագ դպրոցի տնօրենությունը, ուսուցիչներ և աշակերտներ։
Հրավիրված էին նաև Վանաձորի թիվ 4, 8, 15, 23 և 25 հիմնական դպրոցների 9-րդ դասարանցիներ և ուսուցիչներ:
Արտահայտվեցին մասնաճյուղի տնօրեն Արմեն Խառատյանը՝ իր խոսքում կարևորելով տնտեսագիտական հոսքի առկայությունը ավագ դպրոցում։ Ավագ դպրոցի տնօրեն Լուսինե Սարգսյանը շնորհավորեց բովանդակալից աշխատանքի համար, շնորհակալագրեր հանձնեց աշխատանքի ղեկավար Արուսյակ Մադոյանին և 11գ դասարանին, հորդորելով որ նմանատիպ աշխատանքները լինեն շարունակական: