ՀԱՊՀ Վանաձորի մասնաճյուղի ուսանողուհին՝ Հայաստանի հաշվապահների ասոցիացիայի անվանական կրթաթոշակի 2026-2027 ուսումնական տարվա մրցույթի հաղթող 

Սեպտեմբերի 24-ին «Էլիտ Պլազա» բիզնես կենտրոնում տեղի է ունեցել Հայաստանի հաշվապահների ասոցիացիայի անվանական կրթաթոշակի 2026-2027 ուսումնական տարվա մրցույթի հաղթող ուսանողների հավաստագրերի հանձնման պաշտոնական արարողությունը։ 

Միջոցառմանը մասնակցել են տարբեր բուհերի ներկայացուցիչներ, այդ թվում՝ ՀԱՊՀ Վանաձորի մասնաճյուղի կարիերայի և արտաքին կապերի համակարգող Տաթևիկ Մարգարյանը։ 

Անվանական կրթաթոշակի մրցույթի հաղթողներից մեկը ՀԱՊՀ Վանաձորի մասնաճյուղի «Տնտեսագիտություն» մասնագիտության 4-րդ կուրսի ուսանողուհի Միլենա Սուքիասյանն է։ Որախ ենք տեղեկացնել, որ Ասոցիացիայի և գործընկեր կազմակերպությունների հետ համագործակցության արդյունքում Միլենան աշխատանքի է անցել Ասոցիացիայի անդամ «Բիզնես Աջակից» ընկերությունում։ 

Միջոցառման վերջում Ասոցիացիայի նախագահ Հերմինե Թովմասյանը և ուսումնական հաստատությունների ներկայացուցիչները հաղթող ուսանողներին հանձնեցին անվանական կրթաթոշակի հավաստագրեր և գրքեր։ 

Մասնաճյուղի տնօրեն, տ․գ․թ․, դոցենտ Արմեն Խառատյանը հանդիպել է կրթաթոշակակիր Միլենա Սուքիասյանին և «Բիզնես Աջակից» ընկերության տնօրեն Սեդա Ղազարյանին՝ շնորհավորելով ուսանողուհուն ձեռքբերման առթիվ և կարևորելով բուհ-գործատու արդյունավետ համագործակցությունը։ 

Ուսանողների արդի և կիրառական գիտելիքներով զինմանը նպաստելու նպատակով՝ պարոն Խառատյանի առաջարկով Սեդա Ղազարյանը համալրել է մասնաճյուղի դասախոսական կազմը՝ իր մասնագիտական փորձն ու գործնական գիտելիքները փոխանցելու ուսանողներին։ 

Հայաստանի հաշվապահների ասոցիացիայի անվանական կրթաթոշակի մրցույթը շարունակական նախաձեռնություն է, որի նպատակն է խթանել ուսանողների հետաքրքրությունը կրթության նկատմամբ, աջակցել նրանց մասնագիտական զարգացմանը և նպաստել կրթության ու աշխատաշուկայի միջև կապի ամրապնդմանը։