Հայաստանի Ազգային Պոլիտեխնիկական Համալսարանի

ՀԱՊՀ Վանաձորի մասնաճյուղի ավագ դպրոցի 10-րդ դասարանի աշակերտները, ովքեր նաև մեր դպրոցի Արմաթ ինժեներական լաբորատորիայի սաներ են, մասնակցեցին  «Երիտասարդ Նորարարներ–Ապագա Առաջնորդներ» Հեքըթոնին։ Հեքըթոնը կազմակերպված էր EU4Business Innovative Tourism for Armenia նախագծի կողմից՝ GITC – Information Technologies Center-ի հետ համագործակցությամբ։

Հեքըթոնին մասնակցում էին 15-22 տարեկան այն երիտասարդները, ովքեր ունեին տեխնոլոգիական հիմնական հմտություններ, նորարար էին և պատրաստ էին համագործակցել ՀՀ այլ մարզերի երիտասարդների հետ։ Նրանք պետք է ներկայացնեին նորարարական, տեխնոլոգիական ու ինժեներական գաղափար, որի իրականացմամբ հնարավոր կլիներ հզորացնել և վերափոխել մեր երկրում առաջնային  ոլորտները։ Հեքըթոնն իրականացավ մի քանի փուլով և եզրափակիչ փուլում թիմերը ներկայացրին իրենց աշխատանքները և արդյունքում 1-ին և 3-րդ տեղերում հավասար միավորներ ստացան միանգամից 3 թիմ։

Հպարտությամբ նշենք, որ առաջին հորիզոնականը զբաղեցրեց ՀԱՊՀ Վանաձորի մասնաճյուղի ավագ դպրոցի թիմը՝ Yummy mommy-ին։ Թիմի ղեկավարն է մեր ինֆորմատիկայի ուսուցչուհի Արաքսյա Բալյանը, ով նաև Արմաթի խմբավար է, ում ջանքերի շնորհիվ մեր աշակերտները հասնում են բազում հաջողությունների։

Այսօր ՀԱՊՀ Վանաձորի մասնաճյուղը հյուրընկալեց Գյումրու մասնաճյուղի պատվիրակությանը՝ Տիգրան Պետրոսյանի գլխավորությամբ։

Սկզբում ճանաչողական այց կատարվեց Վանաձորի տեխնոլոգիական կենտրոն, որտեղ ՎՏԿ ծրագրերի ղեկավար Աննա Հովհաննիսյանը ներկայացրեց ՎՏԿ-ի հիմնական գործառույթները, Մասնաճյուղի հետ սերտ համագործակցությունը։

Այցելեցինք նաև մեխանիկական լաբորատորիաներ, Դը Գուրուս և Թաֆ Բիլթ Ինդասթրիս ընկերություններ։

Գյումրու մասնաճյուղի աշխատակիցներն եղան նաև Վանաձորի մասնաճյուղում, իրականացրին կարճ շրջայց, այցելեցին նաև «Արմաթն օդում» լաբորատորիա։ Այնուհետև տեղի ունեցավ կլոր սեղանի շուրջ քննարկում, որտեղ պարոնայք Արմեն Խառատյանը և Տիգրան Պետրոսյանը մանրամասն ներկայացրին Լոռվա և Շիրակի մարզերի զարգացման տենդենցները, ինչպես նաև՝ առաջիկա հինգ տարիներին մասնաճյուղերի զարգացման հեռանկարները։ Կլոր սեղանի շուրջ կատարվեց մտքերի և փորձի ակտիվ փոխանակում՝ համապատասխան բաժինների աշխատակիցների միջև։

Հանդիպումն անցավ ջերմ միջավայրում, կարևորվեց մասնաճյուղերի նման համագործակցության շարունակականությունը։

Այսօր ՀԱՊՀ Վանաձորի մասնաճյուղի տնօրենը և արտաքին կապերի համակարգողը հանդիպում ունեցան «Սիներջի» ընկերության Վանաձորի մասնաճյուղի տեխնիկական ղեկավար Սրապ Հունանյանի հետ։ Քննարկվեցին բուհ-գործատու համագործակցության հեռանկարները, ուսանողների մրցունակության բարձրացման, վերապատրաստման դասընթացների կազմակերպման և աշխատանքի տեղավորման հարցեր, փոխշահավետ ծրագրեր, և այլն։

Մասնաճյուղը անընդմեջ իրականացնում է նմանատիպ հանդիպումներ, որոնք միտված են ուսանողների կրթության որակի բարձրացմանը, ինչպես նաև գործնական փորձի հարստացմանը։

Համատեղ քննարկվեց և նախատեսվեց նաև մշակել համագործակցության առավել արդյունավետ ձևաչափեր` կրթական ծրագրերի կատարելագործման և գործնական մակարդակում դրանց կիրառման համար։

Այսօր ՀԱՊՀ Վանաձորի մասնաճյուղի տնօրենը և արտաքին կապերի համակարգողը հանդիպում ունեցան «Ինստիգեյթ Կիսահաղորդիչներ» ընկերության Վանաձորի մասնաճյուղի ղեկավար Մարիամ Սեյրանյանի հետ։ Հանդիպման ընթացքում քննարկվեցին բուհ-գործատու համագործակցության հեռանկարները, ուսանողների մրցունակության բարձրացման, դասընթացների կազմակերպման և աշխատանքի տեղավորման հարցեր, փոխշահավետ ծրագրեր, և այլն։

«Ինստիգեյթ Կիսահաղորդիչներ»-ը հանդիսանում է տեղեկատվական տեխնոլոգիաների և ինժեներության ոլորտում համակարգային լուծումներ առաջարկող «Ինստիգեյթ Խումբ Ընկերություններ»֊ի անդամ։ Օգտագործելով «Ինստիգեյթ» խմբից ժառանգած իր փորձառությունն էլեկտրոնային նախագծման (EDA) ոլորտում՝ «Ինստիգեյթ Կիսահաղորդիչներ» ընկերությունը գլխավորապես զբաղվում է FPGA-ների նախագծմամբ՝ տրամադրելով լուծումներ միկրոսալիկների և կիսահաղորդիչների շուկայի առաջատարներին։

Համատեղ քննարկվեց և նախատեսվեց նաև մշակել համագործակցության առավել արդյունավետ ձևաչափեր` կրթական ծրագրերի կատարելագործման և գործնական մակարդակում դրանց կիրառման համար։

Միջոցառումը լեցուն էր տոնական համերգով, ողջույնի խոսքերով, ուրախության ու հուզմունքի զգացումներով և ուսուցիչներին նվիրված գեղեցիկ ելույթներով։

ՀԱՊՀ Վանաձորի մասնաճյուղի տնօրեն պարոն Խառատյանը շնորհավորեց շրջանավարտներին և նշեց, որ մեծ ձեռքբերում է սովորել և կրթություն ստանալ այս գեղեցիկ ինժեներական միջավայրում, որտեղ  կերտվում է ինժեների կարիերայի լավագույն ուղին։ Հատուկ շնորհակալություն հայտնեց ուսուցիչներին՝ կարևորագույն արժեքներ փոխանցելու համար: Ուրախությամբ նշվեց նաև, որ աշակերտների մեծ մասը ուսումը շարունակելու է պոլիտեխնիկական համալսարանում: 

Ավագ դպրոցի տնօրեն Լուսինե Սարգսյանը աշակերտներին ու ծնողներին շնորհավորեց այս կարևոր օրվա առիթով՝ նշելով, որ ավագ դպրոցը մեծ դեր ունի աշակերտների ոչ միայն կրթության, այլ նաև նրանց դաստիարակության հարցում: Շնորհավորանքներին միացավ նաև ավագ դպրոցի փոխտնօրեն Հասմիկ Հովհաննիսյանը։

Տոնական այս օրը հրավիրված էին գործընկեր կազմակերպություններ՝  Արխիդաչ և Արդեսկ ընկերությունների փոխտնօրեն Անի Ասատրյանը, Դը Գուրուս ընկերության Վանաձորի մասնաճյուղի ղեկավար Հերմինե Հովսեփյանը, Վանաձորի տեխնոլոգիական կենտրոնի ծրագրերի ղեկավար Աննա Հովհաննիսյանը, բազում հյուրեր և ծնողներ, ովքեր համախմբվել էին կարևորելու այս գեղեցիկ տոնակատարությունը՝ իրենց ջերմ բարեմաղթանքներով։

Շնորհավորում ենք բոլորիդ և մաղթում բարի երթ։

ՀԱՊՀ Վանաձորի մասնաճյուղի գնումների և տնտեսավարման բաժնի վարիչը, Էրազմուս+ միջազգային կրեդիտային անձնակազմի շարժունության ծրագրի շրջանակներում, ապրիլի 4-ից 8-ը գործնական այց կատարեց  Կրետեի տեխնիկական համալսարան՝ մասնակցելով աշխատակիցների վերապատրաստման դասընթացին։ Կրետեի տեխնիկական համալսարանը երիտասարդ համալսարան է, որն ունի հստակ առաքելություն՝ նպաստել հասարակությանը գիտակրթական հետազոտությունների միջոցով: Այն ունի ավելի քան 70 լաբորատորիաներ՝ ժամանակակից սարքավորումներով, բարձր տեխնոլոգիական ենթակառուցվածքով և բարձր որակավորում ունեցող անձնակազմով: Կրետեի տեխնիկական հալսարանի աշխատակիցների հետ կազմակերպված հանդիպման ժամանակ մանրամասն ներկայացվեց ՀԱՊՀ-ն, զուգահեռներ անցկացվեցին ՀԱՊՀ-ի և  Կրետեի տեխնիկական համալսարանի միջև։ Ընդգծվեց երկու առաջատար տեխնիկական բուհերի կարևորությունը տնտեսության զարգացման և գիտատեխնիկական առաջընթացի համար, ինչպես նաև Էրազմուս+ ծրագրին մասնակցության կարևորությունը բուհերի զարգացման գործում։

ՀԱՊՀ աշխատակցի վերապարտաստումը իրականացվեց Կրետեի տեխնիկական համալսարանի երեք բաժիններում՝ գնումների կազմակերպման, գույքի կառավարման և տնտեսավարման։

Գույքի կառավարման բաժնում ծանոթացանք  համալսարանի կողմից բացված կազմակերպության լիազորությունների և գործունեության հետ, որը զբաղվում է համալսարանին պատկանող գույքի տնօրինմամբ:

Գնումների բաժնում ներկայացվեցին  եվրոպական գիտահետազոտական ծրագրերի և պետության կողմից  համալսարանին  տրամադրված դրամական միջոցներով գնումների պլանավորմումն ու կազմակերպումը։ Գործընկերների հետ քննարկվեցին Հայաստանում և Հունաստանում գնումների կազմակերպման նմանություններն ու տարբերությունները,  էլեկտրոնային գնումների խնդիրները և այն հնարավորությունները, որոնք տալիս է այդ համակարգը։

Տնտեսավարման բաժնում ծանոթացան համալսարանի ենթակառուցվածքների հետ։ Համալսարանը իրականացնում է  մի շարք միջոցառումներ  շրջակա միջավայրի աղտոտվածությունը նվազեցնելու համար։ Տնտեասվարման բաժնի աշխատանիցները համալսարանի տարածքով շրջում են էլեկտրական մեքնաներով և հեծանիվներով, որոնց վերալիցքավորումը կատարվում է  համալսարանի ներսի արևային կայանի հոսանքով։ Լաբորատոր փորձերի արդյունքում առաջացած հեղուկները երթարկվում են բազմակի ֆիլտրացիայի ջրահեռացման համակարգ լցնելուց առաջ։ Համալսարանը ունի արդի հակարդեհային, էլեկտրամատակարարման, ջեռուցման, ջրամատակարարման և ջրահեռացման  համակարգեր։

Վերապատրաստումը արդյունավետ էր, հագեցած և հետաքրքիր։  Կրետեի տեխնիկական համալսարանի աշխատակիցները բաց են քննարկումների և փորձի փոխանակման համար։ ՀԱՊՀ-ի և Կրետեի տեխնիկական համալսարանի համագործակցությունը ամրապնդվեց և սկիզբ դրվեց նոր գործընկերական հարաբերությունների։

ՀԱՊՀ Կիրառական մաթեմատիկայի և ֆիզիկայի ֆակուլտետի դեկան Իշխան Հովհաննիսյանը և Վանաձորի մասնաճյուղի արտաքին կապերի համակարգող Տաթևիկ Մարգարյանը Էրազմուս+ միջազգային կրեդիտային անձնակազմի շարժունության ծրագրի շրջանակներում մարտի 21-ից 25-ը գործնական այց կատարեցին Պորտուգալիայի Բրագանսայի պոլիտեխնիկական ինստիտուտ՝ մասնակցելով միջազգային շաբաթին։ Վերջինիս մասնակցում էին նաև տարբեր երկրների բուհերի ներկայացուցիչներ։

Առաջին օրը՝ բացման նիստին, Բրագանսայի պոլիտեխնիկական ինստիտուտի նախագահ Լուիս Պաիսը ներկայացրեց կրկնակի դիպլոմների միջազգային հարթակը, միջազգային կրեդիտային շարժունության արդյունքներն ու նոր մարտահրավերները։

Ներկայացվեցին նաև Բոլոնիայի գործընթացի և եվրոպական բարձրագույն կրթական տարածքի վերաբերյալ նյութեր, զեկույցներ եղան՝ բարձրագույն կրթության արդիականացման, եվրոպական բուհերում կրթության և ուսուցման որակի բարելավման թեմաներով։ Միջազգային բաժնի մասնագետ Ֆիլիպ Ռոդրիգեսը ներկայացրեց Բրագանսայի պոլիտեխնիկական ինստիտուտը, այնուհետև գործընկեր երկրների մասնակիցները ներկայացրին իրենց համալսարանները։ ՀԱՊՀ ներկայացուցիչները մանրամասն ներկայացրին բուհի կառուցվածքը, մասնագիտությունները, միջազգային համագործակցությունը, գործընկեր կազմակերպությունների հետ կապը, Էրազմուս+ ծրագրին ակտիվ մասնակցությունը և դրա արդյունքների հաշվետվությունը։

Նշվեց, որ Բրագանսայի պոլիտեխնիկական ինստիտուտում ներկայումս սովորոող և գերազանցությամբ ավարտած ուսանողները ՀԱՊՀ-ի և ԲՊԻ-ի համագործակցության վառ ապացույցն են։ Քննարկվեցին նաև համագործակցության հեռանկարները և այն ոլորտները, որոնք ընդհանուր հետաքրքրություն են ներկայացնում երկու բուհերի համար։

Իրականացվեց նաև ճանաչողական այց ԲՊԻ-ի մասնաշենքեր, լաբորատորիաներ, աշխատանոցներ և գրասենյակներ, որի ընթացքում ծանոթացանք համալսարանի ենթակառուցվածքների հետ։ Նշենք, որ ԲՊԻ-ում մեծամասամբ իրականացվում են գործնական դասեր, քանի որ շեշտը դրված է ուսանողների պրակտիկ ունակությունները զարգացնելու վրա։

Անձնակազմի վերապատրաստումը խիստ հագեցած և արդյունավետ էր։ Այս այցով ստեղծվեցին նոր կապեր, ամրապնդվեց ՀԱՊՀ և ԲՊԻ համագործակցությունը և սկիզբ դրվեց նոր, առավել արդյունավետ համագործակցության։

  Սիրով հայտնում ենք, որ օրերս Միացյալ Թագավորության հեղինակավոր Taylor and Francis Group հրատարակչությունում տպագրվեց “Remanufacturing and Advanced Machining Processes for New Materials & Components” (185 էջ) գիտական մենագրությունը՝ անգլերեն լեզվով։ Գրքի համահեղինակ են տեխնիկական գիտությունների դոկտոր, Ուկրաինայի երկաթուղային տրանսպորտի պետական համալսարանի պրոֆեսոր, ՀԱՊՀ Վանաձորի մասնաճյուղի շրջանավարտ Էդվին Սպարտակի Գևորգյանը և ՀԱՊՀ Վանաձորի մասնաճյուղի տնօրեն, Հայաստանի ճարտարագիտական ակադեմիայի իսկական անդամ, տեխնիկական գիտությունների թեկնածու, դոցենտ Արմեն Գերասիմի Խառատյանը։

Մենագրությունը տպագրվել է երեք բուհերի գիտնականների համագործակցության արդյունքում. Լեհաստանի Ռադոմի տեխնոլոգիա-հումանիտար համալսարան, Ուկրաինայի երկաթուղային տրանսպորտի պետական համալսարան և Հայասատանի ազգային պոլիտեխնիկական համալսարանի Վանաձորի մասնաճյուղ։

Կրթական տեխնոլոգիաների նկատմամբ տարբեր մոտե­ցում­ները կարելի է դի­տարկել որպես ուսումնական ծրագրի իրակա­նացման համախումբ, որն իրենից ներ­կայացնում է ուսուց­ման ձևի, մեթոդների և միջոցների այնպիսի կառուցվածք, որն ապահովում է հասնելու կրթական վերջնանպատակին:

   ՀԱՊՀ Վանաձորի մասնաճյուղի ՈւՄԲ վարիչ տ.գ.թ., դոցենտ Մ.Թ. Նաջարյանի կողմից գործնական օրի­նակներով ներկայացված են դասա­վանդման ընթացքում առարկայական ծրագրով նախա­­տես­ված նյութի մատուցման ինտերակ­տի­վու­թյունը ապահովող տեխ­նիկական, ծրագրային, մանկավար­ժա­կան տարբեր գործիքներ, ուսուցման նորագույն մեթոդներ,  որոնք, էապես տար­բերելով ավանդական գործիքներից, նոր որակի և մշակույթի ձևավորման հիմք են ծառայում:

Պետք է առանձնացնել հեղինակի կողմից մայրենի լեզվով ուսումնամեթոդական գրա­կա­նության ստեղծման գործընթացը, որը  առարկաների ուսուցման ամբողջական էլեկտրո­նային փաթեթների ստեղծման հիմք են հանդիսացել:

ՀՀ Կրթության և գիտության նախարարության որոշմամբ տեխնիկական բուհերի ուսանողների համար  հրատարակվել են «Մետաղա­հատ գործիքներ» դասագիրքը (2007թ.) և «Մետաղահատ հաս­տոցներ և գործիքներ» ուսումնական ձեռ­նարկը (2009թ.), հրատարակվել են «Մետաղների կտրման հի­մունք­ներ և կտրող գործիքներ» մենա­գրու­թյունը (2017թ.):

Տիրապետելով համակարգչային տեխնոլոգիաների որոշակի ծրագրերով աշխատելու կարողություններին Մ.Թ. Նաջարյանը հեղինակել է էլեկտրոնային դա­սախոսությունների մի ամբողջ շարք փաթեթ­ներ՝ «Կտրող գործիքներ 2008թ.», «Մետաղահատ հաստոցներ և  գործիքներ-2009թ.» (http://www.seua.am/new education technology): Այդ ժամանակներից սկսած մասնաճյուղում առաջին անգամ նրա կողմից ներ է դրվել ուսուցման ժամանակակից տեխ­նոլոգիաների կիրառումը կրթական ոլորտում, ստեղծելով առավել արդյունավետ ուսուց­­ման միջավայր:

Ուսուցման արդյունավերտության բարձրացման նպատակով Մ. Թ. Նաջարյանի կողմից վերանայվել է առարկաների ուսումնասիրման մեթոդաբանությունը: Այդ նպա­տակով նա հրա­տարակել է ուսումնամեթոդական ձեռնարկ («Տեխնոլոգիական մեքե­նա­ներ և սար­քա­վո­րում­ներ, Մետաղների կտրում և կտրող գործիքներ» (2019թ.), որը հնա­րա­վո­րու­թյուն է տալիս ուսանողին առարկայի յուրաքանչյուր թեմայի ուսումնա­սի­րու­թյունը իրականացնել համա­կարգ­ված, առավել ուշադրու­թյուն դարձնելով թեմայի համապատասխան բաժիններին:

Յուրաքանչյուր թեմայի ուսում­նասիրությունից հետո ուսանողը հնարա­վո­րու­թյուն ունի օգտվել ներկա­յաց­ված ինքնաստուգման հարցաշարից, պարզելու համար իր իմացությունը նյութի վերա­բերյալ: Ձեռնարկում ընդգրկված է առարկայի լաբո­րա­­տոր փորձերի կատար­ման մեթոդիկան՝ որոշակի տեսական բացատրությամբ: Ընդգրկված է նաև լաբո­րա­տոր փորձերի արդյունքների գրանցման էլեկտրոնային ձևաչափը: Փոր­ձե­րի արդյունքների մուտքագրման էլեկտրոնային տարբերակը պարզեցնում է գրանց­­ման գործընթացը՝ խնայելով ուսանողի ժամա­նա­կը:

Հեղինակի կողմից  2019 թվականին ներկայացվել են «Տեխնոլոգիական մեքենաներ և սարքավորումներ-2019թ.» (https://polytech.am/onlinelectures/eldas_2/), «Մետաղների կտրում և կտրող  գործիքներ-2019թ.»( https://polytech.am/onlinelectures/eldas_1/ ) առարկաների համար անհրաժեշտ էլեկտրոնային նյութերը: 2020թ. դասախոսություւների էլեկտրոնային նյութերը համալրվել է  «Մետաղների կտրում և կտրող  գործիքներ» առարկայի ամբողջական տեսա­ձայ­նագրությունը:

2021 թվականին Մ. Թ. Նաջարյանը ստեղծել է Web կայք՝ (https://mikayelnajaryan.com), որի մեջ ներառված են գիտամանկավարժական  գործունեության ընթացքում նրա կողմից ստեղծած ուսուցման արդի տեխնոլոգիաների կիրառման համար անհրաժեշտ նյութերը:Դասավանդման ընթացքում ուսուցման ինտերակտիվ մեթոդների ներդրման մի­ջոցով նրա կողմից ուսումնական գործընթացի բոլոր բաղադրիչների համալիր բարե​փո​խ​ման քայլ է արվել, որոնք են՝ ինքնուրույն աշխատանք, դասախոսություններ, գործ​նական աշ­խա­­տանք­ներ, լաբո­րատոր փորձարկումներ:

Մ. Թ. Նաջարյանը հանդես է եկել զեկուցումներով գիտաժողովներում, որտեղ ներ­կա­յացրել է մասնաճյուղում իրականացվող ուսուցման ակտիվ մեթոդների ներդրման հաջողու­թյուն­ների մասին.

• «Տեղեկատվական տեխնոլոգիաների կիրառման օրինակներ բարձ­րա­գույն կրթության ոլորտում», Ինֆորմացիոն տեխ­նոլո­գիա­ներ և կայուն զարգացում: Միջազգային գիտաժողով նվիրված ԼՂՀ անկախության հռչակման 18-րդ տարե­դար­ձին: Զեկուցումների հիմնա­դրույթներ 25-26.09.2009թ.:
• «Միջավայրային բարեփոխումները ՀՊՃՀ Վանաձորի մասնաճյուղում»-Կրթության բարեփոխումներ, հիմնախնդիրներ, Հանրա­պետական գիտա­ժո­ղովի նյութեր, Վանաձոր 2010թ.:
• «Ուսուցման ժամանակակից տեխ­նո­լո­գիա­ների կիրառումը բարձրագույն կրթության ոլորտում», ՀԱՊՀ գիտաժողով, Երևան, 2019թ.:
• Внедрение современных технологий обучения в Национальном политехническом университете Армении,  Печатный, 26 марта 2021 г. Новые технологии высшей школы Наука, техника, педа­го­гика, Материалы Всероссийской научно-практической конфе­ренции «Наука – Общество – Технологии – 2021» (Россия, Москва, 26 марта 2021 года).
• «Դասավանդման արդի տեխնոլոգիաների կիրառումը և ուսանողի անհատական աշխատանքի կազմակերպման խնդիրները», ՀԱՊՀ գիտաժողով, Երևան, 2021թ.:

Անհրաժեշտ է առանձնացնել Մ.Թ. Նաջարյան կողմից վերջին տարիներին մասնա­ճյու­ղում իրականացվող ուսանող­նե­րի ինքնու­րույն աշխատանքի կազ­­­մակերպման թի­մա­­յին եղա­նա­կը, որի վերաբերյալ հա­տուկ կար­ծիք է հայտնել ՀԱՊՀ-ի ռեկտորատը:

Թիմային աշ­խա­տանքում ներ­գրավ­ված ուսանողների կա­տա­րած հետազո­տու­­թյուն­ները ներ­­կայացված են տարբեր հար­թակ­նե­րում որպես գիտական զեկույց­ներ, ուսանող­ները ար­դյունք­ները ձևա­կեր­պել են որպես ավար­տական աշխատանք­ներ, մագիստրա­կան թեզեր, հրա­տա­րակել գիտա­կան հոդ­ված­ներ տարբեր ամսա­գրե­րում:

Ուսա­նողների թիմային աշխատանքի արդ­յունք­նե­րը ցույց են տալիս, որ դրա արդյու­նա­վե­տությունը բավականին բարձր է՝ որակ­յալ և ըստ նշա­նակության մասնագետի պատ­րաստման, ձեռնարկությունների հետ համագործակ­ցու­թյան ընդ­լայն­ման, ուսանողների տե­սական, գիտական և հատկապես գործ­նա­կան գիտելիք­նե­րի կուտակման հնարա­վո­րու­թյունների, տարբեր  կուրսերի ուսա­նող­նե­րի համախմբման, փոխ­օգ­նության, թի­մի ներսում և դրանից դուրս գիտե­լիք­ների փո­խա­նակման, անձնական հրա­շալի փոխհա­րա­բե­րու­թյունների առումով: Այս ամենը անշուշտ նպաստում են վաղվա ան­հա­տի ձևավորմանը:

Անհրաժեշտ է նշել Մ.Թ. Նաջարյան մասնակցությունը կրթական բարեփո­խում­ներին նվիր­ված միջոցառումներին, Tempus-ի 15-ամյակին նվիրված (30 նոյեմբեր, 2010, ԵՊՀ) և այլ նախագծերի խորհրդաժողովներին, սեմինարներին (ՀՊՃՀ, ՎՊՄԻ, 2009-2010), ՈԱԱԿ-ի կողմից կազմա­կերպված փորձագետ­ների վերապատրաստման դասընթացներ, 2013-2014թթ. ՈԱԱԿ-ի  վերա­պատրաստման եռա­փուլ դասընթացների մասնակցություն 2016թ. մարտ-ապրիլ,  ՈԱԱԿ-ի հավաստագիր 2016թ.:

Կրթության բնագավառում մատուցած ծառայությունների և անբասիր աշխատանքի համար Մ. Թ. Նաջարյանը պարգևատրվել է  ՀՀ Կ և Գ նախարարության պատվոգրերով  և վաստակագրերով, 2009 թվականին արժանացել է ՀՊՃՀ(Պոլիտեխնիկ) բարձրագույն պարգևի՝ Ոսկե մեդալի:

       Մ. Թ. Նաջարյանը մասնակցել է ՀԱՊՀ  հայտարարված 2020/2021 ուս տարվա  «Դասավանդման արդի տեխնոլոգիաներ կիրառող լավագույն դասախոս» համալսարանական մրցույթին և արժանացել առաջին մրցանակի, ինչի համար շնորհավորում ենք նրան և ցանկանում ուսումնական և գիտամանկավարժական հետագա հաջողություններ:

 ՀԱՊՀ Վանաձորի մասնաճյուղի

տնօրեն ԱՐՄԵՆ ԽԱՌԱՏՅԱՆ

Մարտի 2-ին Վանաձորի տեխնոլոգիական կենտրոնում անցկացվեց տեղեկատվական օր՝ «Ճարտարապետության և քաղաքացիական ճարտարագիտության կրթության վերափոխումը կայուն մոդելի» TACEESM խորագրով, որն իրականացվում է Erasmus+ նախագծի շրջանակներում։ Հանդիպման նպատակը համալսարանի և այլ շահակիցների լայն լսարանին ներկայացնել Եվրամիության կողմից ֆինանսավորվող 16 գործընկեր համալսարանների և կազմակերպությունների կողմից իրականացվող TACEESM Erasmus+ նախագծի նպատակները, խնդիրները և ակնկալվող արդյունքները: ՀԱՊՀ-ն որպես շահառու հանդես է գալիս, ի դեմս նաև ՀԱՊՀ Վանաձորի մասնաճյուղի՝ հիմք ընդունելով «Շինարարական ճարտարագիտություն» մասնագիտությունը և Մասնաճյուղի սերտ համագործակցությունը «Արխիդաչ» հոլանդական ընկերության հետ։ TACEESM Erasmus+ ծրագրի շրջանակներում նախատեսվում են «Շինարարական ճարտարագիտություն» մասնագիտության բակալավրի և մագիստրոսի կրթական ծրագրերի մեկական առարկաների ծրագրային փոփոխություն՝ հաշվի առնելով գործատուների առաջարկները։

Ներկաներին ողջունեց Թվային տեխնոլոգիաների կենտրոնի տնօրեն Ռուբեն Աղգաշյանը, ով նշեց, որ ծրագրի նպատակներից մեկը ճարտարապետական և քաղաքաշինական ոլորտում գործող կրթական ծրագրերի վերափոխումն է՝ ուղղված արդի կայուն մոդելների ձևավորմանը:  Մասնաճյուղի աշակերտներին, ուսանողներին, պրոֆեսորադասախոսական կազմին ողջունեց նաև ՀԱՊՀ միջազգային համագործակցության և կրթական բարեփոխումների գծով պրոռեկտոր Սարգիս Ասատրյանցը, ով նաև պատասխանեց ուսանողների հարցերին, թե ինչպես կարելի է ընդգրկվել միջազգային ծրագրերում, և ինչ չափորոշիչներ են պետք վերջինիս դիմելու համար։

ՀԱՊՀ Տեղեկատվական անվտանգության և ծրագրային ապահովման ամբիոնի վարիչ Գևորգ Մարգարովը հանգամանալից ներկայացրեց ծրագրի բովանդակությունը, սպասվող ակնկալիքները և խոսեց Մասնաճյուղի ներգրավվածության կարևորության մասին։

Տեղեկատվական օրը ՎՏԿ-ում մեզ ողջունեց ՎՏԿ ծրագրերի համակարգող Աննա Հովհաննիսյանը, հանդիպմանը հրավիրված էր նաև «Արխիդաչ» ընկերության աշխատակիցները և տնօրեն Կարինե Աբրահամյանը։ Ընկերության տնօրենը ողջունեց ներկաներին և խոսեց հետագա բարեփոխումների և համատեղ ծրագրերի մասին։

Մասնաճյուղի տնօրեն Արմեն Խառատյանը շնորհակալություն հայտնեց ՀԱՊՀ ներկայացուցիչներին՝ տեղեկատվական օրը Վանաձորում իրականացնելու համար, կարևորեց միջազգային ծրագրերում ներգրավվածությունը, օտար լեզվի իմացությունը և ոգևորեց ուսանողներին և աշխատակազմին առավել ինտեգրված լինել նման ծրագրերում։

Պարոն Խառատյանը շնորհավորեց բոլորիս ՀԱՊՀ հիմնադրման օրվա առթիվ, նշեց, որ ինչպես մարտի մեկը հանդիսանում է գարնան առաջին օր, զարթոնքի օր, այնպես էլ Պոլիտեխնիկի ծնունդը մեր երկրի համար եղավ տեխնոլոգիական կրթության և արդյունաբերության զարթոնքի և զարգացման սկիզբ։

Հանդիպման վերջում հյուրընկալվեցինք մեր գործընկեր, «Արխիդաչ»-ում, որտեղ Մասնաճյուղի «Շինարարություն» բաժնի շրջանավարտ, ընկերության աշխատակից Սասուն Ղազարյանը ներկայացրեց գործիքակազմը և ծրագրերը, որով նրանք աշխատում են եվրոպական և տեղական շուկայի համար։