Մայիսի 6-ին ՀՊՃՀ Վանաձորի մասնաճյուղի ուսանողներն այցելեցին Հայաստանի ազգային ճարտարագիտական լաբորատորիաներ: Լաբորատորիաները հիմնականում նախատեսված են ՀՊՃՀ և նրա բոլոր մասնաճյուղերի ուսանողների լաբորատոր և գիտահետազոտական աշխատանքների կատարման համար:
Մասնաճյուղի ուսանողները նախ շրջեցին նորաստեղծ լաբորատորիաներով, ծանոթացան սարքավորումներին: Նրանք տպավորված էին տվյալների հավաքագրման-չափումների գիտահետազոտական, ճշգրիտ փորձարկումների, գերբարձր հաճախությունների, ռոբոտաշինության, միկրոկարգավորիչների, կապի համակարգերի, հեռահաղորդակցման, չափագիտության, էներգետիկայի, էլեկտրական մեքենաների, ուժային էլեկտրոնիկայի, էլեկտրատեխնիկայի, նյութերի դիմադրության ժամանակակից սարքավորումներով հագեցած լաբորատորիաներով:
Այնուհետև ուսանողները երեք ժամ շարունակ տարբեր տիպի լաբորատոր աշխատանքներ կատարեցին էլեկտրատեխնիկայի, նյութերի դիմադրության և ռոբոտատեխնիկայի լաբորատորիաներում: Նյութերի դիմադրության լաբորատորիայում նորագույն սարքավորման միջոցով նրանք կատարեցին ոլորման փորձ՝ Լ. Հարությունյանի ղեկավարությամբ: Իսկ ռոբոտաշինության լաբորատորիայում նախ ստացան ընդհանուր տեղեկություններ ռոբոտների, տվիչների վերաբերյալ, այնուհետև աշխատեցին ռոբոտների հետ, փորձ կատարեցին SMART Vision System համակարգի հետ: Դասը վարում էր Ա. Հովհաննիսյանը: Մեխանիկա-մեքենագիտության լաբորատորիայում փորձ կատարեցին PXI սարքավորման վրա, որտեղ ակնառու տեսան շարժիչի աշխատանքը՝ կախված արագությունից և տարբեր պայմաններից:
Վանաձորի մասնաճյուղի ուսանողներին ոգևորեցին նաև իրենց հասակակիցների աշխատանքները` շրջված ճոճանակը, SMART ջերմոցը, մագնիսական լևիտացիոն սարքը, ճանապարհային երթևեկության լուսացույցերի ավտոմատ ղեկավարման համակարգը, Դելտա ռոբոտը, լուսային խորանարդը և այլն:
Նման այցելությունները պետք է կրեն շարունակական բնույթ, որի արդյունքում մասնաճյուղի յուրաքանչյուր ուսանող հնարավորություն կունենա իր լաբորատոր և գիտահետազոտական աշխատանքներն իրականացնել նորագույն սարքավորումներով և տեխնիկայով հագեցած ՀՊՃՀ ազգային ճարտարագիտական լաբորատորիաներում:
Շուտով նմանատիպ լաբորատորիաներ, ավելի փոքր ծավալներով, կստեղծվեն ՀՊՃՀ-ի մասնաճյուղերում, բացի այդ` հեռակառավարման սկզբունքով էլեկտրոնային կապ կապահովվի մայր համալսարանի հետ, ինչը հնարավորություն կընձեռի կազմակերպել տեսակոնֆերանսներ ՀՊՃՀ-ի մասնաճյուղերի և կենտրոնական կրթահամալիրի միջև:
Ապրիլի 14-ին ՀՊՃՀ (Պոլիտեխնիկ) Վանաձորի մասնաճյուղում տեղի ունեցավ հանդիպում ”Orange Armenia”-ի հայաստանյան գրասենյակի տնօրեն Ֆրանսիս Ժելիբտերի հետ: Բացման խոսքով հանդես եկավ մասնաճյուղի տնօրեն Արմեն Խառատյանը: Նա նշեց, որ “Orange Armenia”-ի հետ համագործակցությունն արդեն երեք տարվա պատմություն ունի: 2011թ. կնքվել է համագործակցության համաձայնագիր, որի համաձայն` գրասենյակի կողմից մասնաճյուղում ստեղծվել է Օրանժի հատուկ անկյուն, որն ուսանողներին հնարավորություն է ընձեռում անսահմանափակ կերպով անվճար օգտվելու համացանցից: Օրանժը բուհում անցկացրել է սեմինարներ, բացի այդ՝ ուսանողներն ուսումնական պրակտիկան անցկացնում են Օրանժի գրասենյակներում՝ ստանալով որոշակի աշխատավարձ, որը նրանց հնարավորություն է տալիս հետագայում աշխատանքի անցնելու ընկերությունում: Շնորհակալություն հայտնելով կատարված աշխատանքների համար՝ Ա.Խառատյանը համոզմունք հայտնեց, որ սույն համագործակցությունն էլ ավելի կնպաստի ուսանողների առաջադիմության և հետագա կարիերայի աճին:
