Հայաստանի Ազգային Պոլիտեխնիկական Համալսարանի

Ուրախ ենք տեղեկացնել, որ ՀԱՊՀ Վանաձորի մասնաճյուղի ավագ դպրոցի աշակերտներ՝ Նարե Դալլաքյանը, Սարգիս Առաքելյանը և Արես Մելիքսեթյանը Koreez-Armath ճարտարագիտական մրցույթում զբաղեցրել են լավագույն տասնյակը։

Առանձնակի շնորհավորում ենք Նարե Դալլաքյանին՝ Koreez-Armath ճարտարագիտական մրցույթում 1-ին պատվավոր հորիզոնականը զբաղեցնելու համար։

Առանձնահատուկ շնորհակալություն ենք հայտնում ավագ դպրոցի ինֆորմատիկայի ուսուցչուհի, Արմաթի խմբավար Արաքսյա Բալյանին՝ իր անձնվեր աշխատանքի համար։

Սույն թվականի սեպտեմբերի 26-ին ՀԱՊՀ Վանաձորի մասնաճյուղում տեղի ունեցավ հանդիպում՝ Էրազմուս+ միջազգային փոխանակման ծրագրին մասնակցած երկու ուսանողների հետ։

«Ծրագրային ճարտարագիտություն»  մասնագիտության երկրորդ կուրսի ուսանողներ Գոռ Խուրշուդյանը 2024թ․-ի գարնանային կիսամյակում սովորել է Լեհաստանի Լյուբլինի տեխնոլոգիական համալսարանում, իսկ Վարդան Թաթոսյանը 2024թ․-ի գարնանային կիսամյակում սովորել է Իսպանիայի Գրանադայի համալսարանում։

Ուսանողները կիսվեցին իրենց փորձով, ներկայացրին, թե ինչ տվեց իրենց փոխանակման ծրագրին մասնակցությունը, ինչ նոր անձնային հմտություններ են ձևավորել, խոսեցին ձեռք բերված գիտելիքներից, ուսումնական գործընթացում կիրառված նոր մեթոդներից և, իհարկե, միջմշակութային հարաբերություններից։

Վերջիններս նշեցին, որ արտասահմանյան բուհերում մեծամասամբ իրականացվում են գործնական դասեր, քանի որ շեշտը դրված է ուսանողների պրակտիկ ունակությունները զարգացնելու վրա։

 Միջազգային փոխանակման ծրագրին մասնակցած ուսանոնղները նաև ընդհանուր տեղեկություն տվեցին շարժունությանը մասնակցելու համար, այն է՝ ուսանողները պետք է տիրապետեն սահուն անգլերենին, հետևեն մայր բուհում պարբերաբար հրապարակվող Էրազմուս+ ուսանողների շարժունության մրցույթի հայտարարություններին, մրցույթն անցնելուց հետո պետք է իրականացնել հյուրընկալող բուհի առաջարկած դասընթացների և մայր բուհի ուսումնական ծրագրի առարկաների կրթական վերջնարդյունքների համադրելիությունը և կուտակված կրեդիտների փոխճանաչումը:

Բակալավրի դիմորդները կարող են շարժունության մրցույթին դիմել երկրորդ կուրսից ներառյալ, իսկ ավարտական կուրսի  ուսանողները շարժունության ծրագրին մասնակցել չեն կարող: Ուսանողների շարժունության տևողությունը կարող է տևել նվազագույնը 2 ամսից մինչև առավելագույնը 12 ամիս:

Հանդիպման նպատակն էր ուսանողների շարժունության խթանումը կրթության զարգացման համար՝ հիմնված եվրոպական բուհերի լավագույն փորձի վրա։

Վերջում տեղի ունեցավ հարց ու պատասխանի ակտիվ փոխանակում:

Մրցույթն անցկացվում է երկու փուլով՝ թեստավորման և հարցազրույցի:
Թեստավորման փուլն անցկացվում է՝ ըստ ՀՀ ԿԳՍՄՆ մշակած հարցաշարի: Հարցազրույցի փուլի հարցաշարը կազմում է հաստատությունը և յուրաքանչյուր մասնակցի հետ հարցազրույցն անցկացնում առանձին:
Մրցույթին մասնակցելու համար մասնակիցը տնօրենի կողմից նշանակված պատասխանատու աշխատակցին է ներկայացնում 1) դիմում (Ձև 1), մեկ լուսանկար 3X4 չափսի, 2) բարձրագույն կրթությունը հավաստող փաստաթուղթ (դիպլոմ) (միջին մասնագիտական կրթություն ունեցող և կամավոր ատեստավորում անցած ուսուցչի կողմից դպրոցի թափուր տեղի մրցույթին մասնակցելու դեպքում՝ միջին մասնագիտական կրթության փաստաթուղթ), 3) անձը հաստատող փաստաթուղթ, 4) «Հանրակրթության մասին» օրենքի 26-րդ հոդվածի 1-ին մասին համապատասխան՝ աշխատանքային ստաժի վերաբերյալ տեղեկանք աշխատավայրից և աշխատանքային գրքույկի պատճենը՝ առկայության դեպքում, 5) ինքնակենսագրություն (Ձև 5), 6) այլ պետությունների քաղաքացիները Հայաստանի Հանրապետությունում աշխատելու իրավունքը հավաստող փաստաթուղթ,
7) Հայաստանի Հանրապետության արական սեռի քաղաքացիները՝ նաև զինվորական գրքույկ,
8) հրատարակված հոդվածների ցանկ կամ գիտական կոչումը հավաստող փաստաթղթեր (առկայության դեպքում),
9) որակավորման տարակարգ ունենալու դեպքում՝ հավաստող փաստաթուղթ,
10) Հայաստանի Հանրապետության կառավարության 2022 թվականի ապրիլի 28-ի N 596-Ն որոշմամբ սահմանված կարգին համապատասխան՝ հաստատությունից դուրս մնացած լինելու դեպքում՝ կամավոր ատեստավորումից 60 և ավելի տոկոս արդյունք ցուցաբերած լինելու մասին տեղեկություն (մասնակցած լինելու դեպքում).
11) «Հանրակրթության մասին» օրենքի 26-րդ հոդվածի 2-րդ մասի 1-ին կետի (առկայության դեպքում նաև՝ 2-րդ կետի) պահանջվող համապատասխան փաստաթուղթ.
 12) «Հանրակրթության մասին» օրենքի 26-րդ հոդվածի 2-րդ մասի 3-րդ կետի պահանջին համապատասխան տեղեկանք՝ բարձրագույն ուսումնական հաստատությունից:
Տնօրենի կողմից նշանակված պատասխանատու անձը փաստաթղթերի բնօրինակները համեմատում է պատճեների հետ և բնօրինակները վերադարձնում: Եթե ներկայացված փաստաթղթերի ցանկն ամբողջական չէ կամ առկա են թերություններ, մասնակիցը կարող է մինչև փաստաթղթերի ընդունման ժամկետի ավարտը վերացնել և համալրել դրանք:
Փաստաթղթերը ընդունվում են 2024 թվականի սեպտեմբերի 25-ից մինչև հոկտոմբերի 8-ը ներառյալ, ամեն օր՝ ժամը 10:00-ից 15:00-ը, բացի շաբաթ, կիրակի և ոչ աշխատանքային այլ օրերից:
Մրցույթը տեղի կունենա 2024թ. հոկտեմբերի 10-ին՝ ժամը 14:00-ին, ՀԱՊՀ Վանաձորի մասնաճյուղի ավագ դպրոցում,
հասցե՝ ք. Վանաձոր , Շինարարների 12:
Տեղեկությունների համար զանգահարել՝ (096) 11-08-50, (091) 49-48-55, (0322) 5-66-58 հեռախոսահամարներով:

Մրցույթ ավագ դպրոցի «Ֆիզկուլտուրա» (23 դասաժամ), «Ֆիզիկա»(8  դասաժամ),  «Գծագրություն» (3  դասաժամ) և «Տնտեսագիտության հիմունքներ»

  (6 դասաժամ)ուսուցչի թափուր տեղերի համար:

Մրցույթն անցկացվում է երկու փուլով՝ թեստավորման և հարցազրույցի:

Թեստավորման փուլն անցկացվում է՝ ըստ ՀՀ ԿԳՍՄՆ մշակած հարցաշարի: Հարցազրույցի փուլի հարցաշարը կազմում է հաստատությունը և յուրաքանչյուր մասնակցի հետ հարցազրույցն անցկացնում առանձին:

Մրցույթին մասնակցելու համար պետք է ներկայացնել՝

–  դիմում(Ձև 1),

–  1 լուսանկար 3×4 չափի,

– բարձրագույն  կրթությունը հավաստող   փաստաթուղթ (դիպլոմ),

– անձը հաստատող փաստաթուղթ,

– «Հանրակրթության  մասին» ՀՀ  օրենքի 26-րդ հոդվածի  1-ին մասին  համապատասխան՝ աշխատանքային ստաժի վերաբերյալ տեղեկանք  աշխատավայրից և աշխատանքային գրքույկի պատճենը (առկայության դեպքում),

– ինքնակենսագրություն(Ձև 5),

– այլ պետությունների քաղաքացիները՝ ՀՀ-ում աշխատելու իրավունքը հավաստող փաստաթուղթ,

–  ՀՀ արական սեռի քաղաքացիները՝ նաև զինվորական գրքույկ,

– հրատարակված հոդվածների ցանկ կամ գիտական կոչումը հավաստող փաստաթղթեր (առկայության դեպքում),

–  որակավորման տարակարգ ունենալու դեպքում՝  հավաստող փաստաթուղթ:

Տնօրենի կողմից նշանակված պատասխանատու անձը  փաստաթղթերի բնօրինակները համեմատում է պատճեների հետ և բնօրինակները վերադարձնում: Եթե ներկայացված փաստաթղթերի ցանկն ամբողջական չէ կամ առկա են թերություններ, մասնակիցը կարող է մինչև փաստաթղթերի ընդունման  ժամկետի ավարտը վերացնել և համալրել դրանք:

Փաստաթղթերը ընդունվում են 2024 թվականի սեպտեմբերի 05-ից մինչև  սեպտեմբերի 18-ը ներառյալ, ամեն օր՝ ժամը 10:00-ից 15:00-ը, բացի շաբաթ, կիրակի և ոչ աշխատանքային այլ օրերից:

      Մրցույթը տեղի կունենա 2024թ. սեպտեմբերի  24-ին՝ ժամը 14:00-ին, ՀԱՊՀ Վանաձորի մասնաճյուղի ավագ դպրոցում, հասցե՝ ք. Վանաձոր , Շինարարների 12:

Տեղեկությունների համար զանգահարել՝ (096) 11-08-50, (091) 49-48-55, (0322) 5-66-58 հեռախոսահամարներով:

Ուսումնական տարվա մեկնարկը տրվեց ՀԱՊՀ Վանաձորի մասնաճյուղի միջոցառումների դահլիճում։ Պոլիտեխնիկի տանիքի ներքո հավաքվել էին ավագ դպրոցի 10-րդ դասարանի աշակերտներ, բակալավրի և մագիստրատուրայի առաջին կուրսեցիներ, պրոֆեսորադասախոսական և ուսուցչական կազմը: Միջոցառման սկզբում հնչեց ՀՀ օրհներգը և Պոլիտեխնիկի հիմնը:

Ուսումնական տարվա մեկնարկի կապակցությամբ ուսանողներին շնորհավորեց ՀԱՊՀ Վանաձորի մասնաճյուղի տնօրեն Արմեն Խառատյանը. «Շնորհավորում եմ ձեզ Հայաստանի հզորագույն ճյուղային կառուցվածք ունեցող ինժեներական բուհը ընդուվելու կապակցությամբ, որը զինված է գերհագեցած, նորարարական լաբորատորիաներով,  ուսանողամետ և հեռնկարային ծրագրերով, ուստի դուք ունեք լայն հնարավորություններ՝ մեծ ձեռքբերումների համար։ Դուք եք այն հայելին, ովքեր լավագույնս կարտացոլեն ինժեներական կրթության կարևորությունն ու դերը պետության զարգացման գործում»:

Ուսանողներին և աշակերտներին շնորհավորեց նաև ՀԱՊՀ Վանաձորի մասնաճյուղի ավագ դպրոցի տնօրեն Լուսինե Սարգսյանը, ով հորդորեց վերջիններիս լինել առաջադեմ, նպատակասլաց, առավել պրպտող և ավելիին հասնող: Շնորհավորանքներին միացան նաև ՀԱՊՀ Վանաձորի մասնաճյուղի ավագ դպրոցի փոխտնօրեն Հասմիկ Հովհաննիսյանը, Ուսանողական խորհրդի նախագահ Վարդան Շերմազանյանը։ Տոնական օրը մեզ շնորհավորեց նաև Մասնաճյուղի լավագույն շրջանավարտներից Անժելա Ազարյանը, ով ղեկավարում է ‟Bee Digital” մարքեթինգային ընկերությունը, վերջինս ներկաներին պատմեց իր հաջողության ուղու մասին:

Միջոցառման ընթացքում լավագույն ուսանողները և ավագ դպրոցի աշակերտները տարբեր անվանակարգերով պարգևատրվեցին շնորհակալագրերով։

Միջոցառումն իրենց պարով ու երգերով առավել գեղեցիկ դարձրին ՀԱՊՀ շրջանավարտ, Մասնաճյուղի մագիստրատուրայի ուսանող և ներկայիս աշխատակից Մարիամ Զոհրանյանը, ավագ դպրոցի աշակերտներ Հովհաննես Վարդերեսյանը և Յանա Զաքարյանը։

Մասնաճյուղում մեկնարկեց  2024-2025թթ․ ուսումնական տարին, բոլորին մաղթում ենք արդյունավետ և խաղաղ ակադեմիական տարի։

Այսօր ՀԱՊՀ Վանաձորի մասնաճյուղը ճանապարհեց ինժեներական, տեխնոլոգիական, տնտեսագիտական մասնագիտացումներով թվով մոտ 100 առկա և հեռակա համակարգում սովորող բակալավրի, մագիստրատուրայի շրջանավարտներին: Տոնական օրը սկսվեց ՀՀ և Պոլիտեխնիկի օրհներգներով, ողջույնի և բարեմաղթանքների խոսքերով։

Շնորհավորանքի խոսքով հանդես եկավ Մասնաճյուղի տնօրեն Արմեն Խառատյանը, ով իր խոսքում նշեց, որ Պոլիտեխնիկը եղել է և կմնա մեր երկրի տեխնոլոգիական առաջատարը, որը միտված է հզորացնելու մեր երկիրը, իսկ հզորանալու լավագույն միջոցը կրթությունն է։ Պարոն Խառատյանը մաղթեց շրջանավարտներին, որ համալսարանում ձեռք բերված մասնագիտական գիտելիքները և ձևավորած հմտությունները հաջողությամբ կիրառեն իրենց մասնագիտական գործունեության ընթացքում և իրենց մեծ ներդրումն ունենան մեր երկրի զարգացման գործում։

Շրջանավարտներին շնորհավորեցին նաև Ուսումնամեթոդական աշխատանքների և միջազգայնացման գծով փոխտնօրեն Աշոտ Գյուրջինյանը, Արտաքին կապերի համակարգող Տաթևիկ Մարգարյանը և Ուսանողական խորհրդի նախագահ Վարդան Շերմազանյանը։

Պարոն Խառատյանը հավաստագրեր հանձնեց «Պոլիտեխնիկ. ստեղծարար միտք, հմուտ ձեռքեր» խմբակի սաներին, ովքեր հաջողությամբ ավարտել էին «Գրաֆիկ դիզայն»-ի դասընթացը։  Խմբակի շրջանակներում կազմակերպված առաջին դասընթացը «Գրաֆիկ դիզայն»-ի դասընթացն էր, որը վարում էր մեր լավագույն շրջանավարտներից մեկը՝ Էդիտա Հովհաննիսյանը։ Դասընթացի վերջում ուսանողները և ավագ դպրոցի աշակերտները լավագույնս ներկայացրել էին իրենց ավարտական աշխատանքները։

«Պոլիտեխնիկ. ստեղծարար միտք, հմուտ ձեռքեր» խմբակի շրջանակներում դասընթացները կրելու են շարունակական բնույթ և լինելու են տարատեսակ։

            Դիպլոմները հանձնելիս պարոն Խառատյանը և պարոն Գյուրջինյանը շրջանավարտներին շնորհավորում էին և հորդորում՝ բարձր պահել պոլիտեխնիկցիների վեհ անունն ու արժանիքները։

• Փաստաթղթերի առաջին փուլի ընդունելությունը տեղի կունենա հունիսի 5-ից (աշխատանքային օրեր), 20-ը ներառյալ, ժամը 09։00-17։00
• Փաստաթղթերի երկրորդ փուլի ընդունելությունը տեղի կունենա օգոստոսի 19-ից (աշխատանքային օրեր) 29-ը ներառյալ, ժամը 09:00-17:00:

Դիմորդը դիմում-հայտի հետ ներկայացնում է՝

 • բակալավրի, դիպլոմավորված մասնագետի կամ մագիստրոսի դիպլոմների և դրանց ներդիրների բնօրինակի պատճեն,

     • երաշխավորագիր,

     • 4 հատ լուսանկար (3×4սմ),

     • անձնագիր (բնօրինակ և պատճեն),

     • փաստաթուղթ զինվորական ծառայության առնչության մասին (բնօրինակ և (1-4, 16-19 էջերի պատճեն)),

     • սահմանված կարգով հաստատված տպագրված գիտական աշխատությունների ցուցակ (առկայության դեպքում),

     • փաuտաթղթերն ընդունելու, մշակելու և ձևակերպելու համար 1500 ՀՀ դրամ վճարելու վերաբերյալ անդորրագիրը:

ՀՀ  Լոռու մարզի  ռազմավարական  պլանով նախատեսված ՉԻՆՎԱՆ ՍՊԸ ձեռնարկությունում  ենթակառուցվածքների զարգացմանը միտված արտադրության  կազմակերպման բիզնես ծրագրի մշակման նպատակով, ինչպես նաև հաշվի առնելով ՀԱՊՀ Վանաձորի մասնաճյուղի և կազմակերպության համագործակցությունը, ՉԻՆՎԱՆ ՍՊԸ-ն դիմել է Մասնաճյուղին՝ խնդիրների լուծումները գտնելու ակնկալիքով: Այդ նպատակով Մասնաճյուղում ստեղծվել է աշխատանքային խումբ:

Խմբում ընդգրկվել  են մասնաճյուղի «Տնտեսագիտություն» մասնագիտության չորրորդ կուրսի ուսանողներ Մերի Օհանյանը, Էդգար Ասատրյանը, Սերգեյ Անանյանը, դոցենտներ Միքայել Նաջարյանը և Լուսինե Աղաբաբյանը:

 Խմբի առջև խնդիր է  դրվել` կա­տա­րել  շուկայի  ուսումնասի­րու­թյուն, կազ­­­մել  բիզ­նես պլան, մշակել  ներ­դրու­մա­յին  ռազմ­ա­վա­րություն:

 Նախա­­տեսվել է կազմել բիզ­նես փա­թեթ և այն տրա­մադրել ձեռ­նար­կու­թյանը` ոլոր­տում որո­շա­կի գոր­ծա­­ռույթների իրա­կա­նաց­ման հա­­մար:

Թիմն ուսում­նասիրել է ձեռ­­նար­­կու­թյան ներդրումային ռազ­մա­վա­­րու­թյան զարգացման և հնա­րա­վոր ներ­դրում­ների որոն­ման խնդիր­ները: Թիմի անդամները եղել են ձեռնարկությունում, տեղում ծանոթացել կազմակերպության խնդիրներին:

Թիմի կատարած աշխա­­տանք­ների արդյունքները ուսանողները ներկայացրել են Մոսկվայի Պոլիտեխնիկական համալսարանի տարեկան գիտաժողովում, այն ընդունվել է հրատարակման համալսարանի գիտական ամսագրում:

Թիմում ընդգրկված  յուրաքանչյուր ուսանող ունեցել է կոնկրետ առաջադրանք։ Վերջիններս կատարել են իրենց հանձնարարված առանձին խնդիրների ուսումնասիրություններ, տվել են համապատսխան լուծումներ:

Կատարված աշխատանքները և արդյունքները թույլ են տալիս արձանագրել, որ ուսանողների թիմային աշխատանքն ունի էական առավելություններ:

Համագործակցությունը տնտեսվարողների հետ կկրի շարունակական բնույթ, որպեսզի Հայաստանի ազգային պոլիտեխնիկական համալսարանի Վանաձորի մասնաճյուղի ճարտարագիտական միտքը ներդրվի արտադրության զարգացման համար։

Մայիսի 2-ից 10-ը ՀԱՊՀ Վանաձորի մասնաճյուղում անց է կացվելու ուսանողական տարեկան գիտաժողով, որը նվիրված է Վանաձորի մասնաճյուղի հիմնադրման 65-ամյակին:

Մայիսի 2-ին մեկնարկեց ավանդույթ դարձած ուսանողական տարեկան գիտաժողովը։ Հոբելյանական պլենար նիստին ողջույնի խոսքով հանդես եկան Մասնաճյուղի տնօրեն Արմեն Խառատյանը, Ուսանողական խորհրդի նախագահ Վարդան Շերմազանյանը։ Պարոն Խառատյանն իր խոսքում նշեց, որ Մասնաճյուղի հիմնադրումը կենսական կարևորություն է ունեցել Լոռու մարզի տնտեսական զարգացման հարցում: Պոլիտեխնիկը այն հիմնական սնուցող զարկերակն է, որը տարածաշրջանին ապահովում է ժամանակակից ինժեներական կրթությամբ: Ինչպես նաև հավելեց, որ լիարժեք բարձրագույն կրթություն ստանալու համար անհրաժեշտ են ոչ միայն տեսական գիտելիքներ, այլև ուսանողի կողմից իրագործվող գիտահետազոտական աշխատանքներ: Պարոն Խառատյանը կարևորում է նաև անգլերեն լեզվի իմացությունը, որն ինժեներին ավելի լայն հնարավորություններ է ընձեռում, այս առումով պլենար նիստում ընդգրկված էր անգլերեն լեզվով ելույթ, որն, ի դեպ, մեր ուսանողը լավագույնս ներկայացրեց։

Գիտաժողովի առաջին լիագումար նիստին ներկայացվեց 3 ելույթ.

• Բաբայան Մարտուն․ “Graphic design”-ի գաղափարը և իրականացումը։
• Երվանդ Հարությունյան․ “Artifical intelligence: Progress or regress?”․
• Կարապետյան Հովհաննես․ «Չինաստանի տնտեսության ֆենոմենը. որքանո՞վ է ընդօրինակելի նրա փորձը ՀՀ-ի համար»։

Յուրաքանչյուր ելույթից հետո հնչում էին տարատեսակ հարցեր և ուսանողների և դասախոսների միջև տեղի էր ունենում քննարկումներ՝ վերոնշյալ թեմաների շուրջ։

Հետաքրքիր թեմաներ են սպասվում նաև տարբեր ամբիոնների առանձին սեկցիաներում:

Մասնաճյուղի տնօրեն Արմեն Խառատյանը կարևորում է նման գիտաժողովների անցկացումը և´ բակալավրիատի, և´ մագիստրատուրայի ուսանողների համար, քանի որ դրանք օգնում են հետագայում գիտահետազոտական աշխատանքներ կատարել, նպաստում են, որ բուհի շրջանավարտները դառնան ստեղծագործող ճարտարագետներ:

Լավագույն աշխատանքները հետագայում կներկայացվեն տպագրության:

ՀԱՊՀ Վանաձորի մասնաճյուղում հյուրընկալեցինք մարդկային ռեսուրսների կառավարման մասնագետ Նաիրա Էվոյանին, ով անցկացրեց երկօրյա դասընթաց  փափուկ հմտությունների (Soft Skills) վերաբերյալ։

Ուսանողներին և ավագ դպրոցի ավարտական դասարանների աշակերտներին ներկայացվեց, թե ինչ են իրենցից ներկայացնում փափուկ հմտությունները, աշխատակազմի որոնման ուղիները, ընտրության ուղիները, հարցազրույցի տեսակները, ուսուցումը և մոտիվացիան:

Ներկայացվեց նաև՝ ինչպես կազմել գրագետ ինքնակենսագրական, ինչպես ճիշտ ներկայանալ գործատուին կամ դիմել որևէ ծրագրի, ինչպես որոշակի հետաքրքրություն առաջացնել գործատուի մոտ, ինչպես գրել ճիշտ ուղեկցող նամակ, որպեսզի մեր դրդապատճառները լինեն համոզիչ միջազգային, փոխանակման ծրագրերում մրցունակ լինելու համար:

Խոսվեց ուղեկցող նամակ գրելու օրինաչափություններից, կառուցվածքից և բովանդակությունից: Այս դասընթացի նպատակն է ուսանողներին արդյունավետ դարձնել կրթության և աշխատանքի ոլորտում, զարգացնել կարիերայում և կյանքում այդքան անհրաժեշտ ճկուն հմտությունները և գրանցել նոր հաջողություններ այդ ոլորտներում։ Դասընթացը կխթանի ուսանողների մոտ զարգացնել նաև վերլուծական և կառուցողական մտածողությունը, որոշումներ կայացնելու և բարդ իրավիճակներում ելք գտնելու կարողությունը, ավելի արդյունավետ կառավարել սեփական ժամանակը և շատ այլ հմտություններ։

Վերջում տեղի ունեցավ մտքերի ակտիվ փոխանակում: