Հայաստանի Ազգային Պոլիտեխնիկական Համալսարանի

Հայաստանի ազգային պոլիտեխնիկական համալսարանի և Ձեռնարկությունների ինկուբատոր հիմնադրամի համագործակցության շրջանակներում ՀԱՊՀ Վանաձորի մասնաճյուղի ուսանողները մասնակցել են Վանաձորի տեխնոլոգիական կենտրոնում կազմակերպված Solidworks-ի մասնագիտացված դասընթացին, որն իրականացրել է ՎՏԿ բիզնեսի զարգացման պատասխանատու Պատվական Հախինյանը: 

Դասընթացը հաջողությամբ ավարտել է ութ ունկնդիր՝ որից չորսը ՀԱՊՀ Վանաձորի մասնաճյուղի ուսանողներ են: 

Դասընթացի ընթացքում ուսանողները տիրպետեցին Solidworks ծրագրի հիմնական հնարավորություններին, այն է՝ ստեղծել դետալի եռաչափ մոդելը և դրա գծագիրը, սովորեցին բարդ մակերևութների կառուցում, մեքենաների և մեխանիզմների հավաքական մոդելներ և գծագրերի կառուցում, մեխանիզմների աշխատունակության ստուգում և անիմացիայի տարրեր: Դասընթացի ընթացքում  ուսանողները կարողացել են գործնականում կիրառել և ընդլայնել բուհում ստացած գիտելիքները, ձեռք բերել համապատասխան հմտություններ և կարողություններ մասնագիտական բնագավառում: 

Սեպտեմբերի 12-ին Վանաձորի տեխնոլոգիական կենտրոնում տեղի ունեցավ եռամսյա մասնագիտացված դասընթացը հաջողությամբ ավարտածների վկայականների հանձնման արարողությունը:  Միջոցառման ընթացքում դասընթացի մասնակիցները ներկայացրին իրենց կատարած նախագծերը, ինչպես նաև՝ ծանոթացրին Solidworks ծրագրի հնարավորությունների հետ:  

Մասնաճյուղի տնօրեն Արմեն Խառատյանն իր շնորհակալությունը հայտնեց Վանաձորի տեխնոլոգիական կենտրոնին՝ անվճար հիմունքներով դասընթացը կազմակերպելու, ուսանողների մասնագիտական կարողություններն ընդլայնելու և զարգացնելու համար: Պարոն Խառատյանը ողջունեց նման դասընթացների կազմակերպումը, նշեց, որ ուսանողները կարող են իրենց ստացած գիտելիքները և գործիքակազմը կիրառել կուրսային, դիպլոմային աշխատանքներում, ինչպես նաև՝ հետագա աշխատանքային կարիերայում: Հավելեց, որ համագործակցության արդյունքում ստեղծվել է ժամանակակից գիտակրթական, նորաստեղծային միջավայր՝ միտված ժամանակակից պահանջներին համահունչմասնագետների պատրաստմանը:  

Վերջում կատարվեց նոր դասընթացին մասնակցել ցանկացողների հավաքագրում: 

ՀԱՊՀ Վանաձորի մասնաճյուղում տեղի ունեցավ «Ես հայ եմ» խորագրով միջոցառում՝ նվիրված ՀՀ անկախության 26-ամյակին: Միջոցառումը կազմակերպել էր Մասնաճյուղի ավագ դպրոցի դաստիարակչական աշխատանքների կազմակերպիչ, XI գ դասարանի դասղեկ Մարթա Գալստյանը: Նա նշեց, որ կարևոր է այսօրվա պատանիների մեջ սերմանել սեր ու հարգանք առ հայրենիք: Նրանք պետք է գիտակցեն ազատ և անկախ լինելու խորհուրդը, պետք է պարտավորված լինեն պահպանել և էլ ավելի հզոր ու կայացած Հայաստան կերտել իրենց հավատքով, ուժով և ավյունով: Միջոցառման նպատակն էր բարձրացնել այսօրվա աշակերտների ու ապագա զինվորների հայրենասիրական ոգին, հարգանքի արժանացնել, հիշել և մեծարել մերօրյա հերոս տղաներին, ովքեր իրենց կյանքը չխնայեցին ապրիլյան պատերազմում՝ մեր երկրի սահմաններն անառիկ պահելու համար: Հայը իր անցյալով, ներկայով և ապագայով իրավունք ունի ապրելու, հարատևելու և բարգավաճելու: Կռվում ենք, ուրեմն կանք ու լինելու ենք ազատ ու անկախ: Մեկ րոպե լռությամբ հարգեցինք այն անձնվեր զինվորների հիշատակը, ովքեր իրենց կյանքը զոհաբերեցին հայրենիքի վաղվա օրվա համար:

Աշակերտներն իրենց գեղեցիկ երգով ու պարով ավելի տոնական դարձրին օրը: Այս ձևով փորձում ենք մեր սերը առ հայրենիք փոխանցել մեր մատաղ սերնդին, անկախության սերնդին, որ այդքան դժվար ձեռք բերված ազատ մեր երկիրը պահպանեն, շենացնեն, հաստատ կանգնեն մեր սուրբ հողի վրա և ինչ դժվարություններ էլ լինեն, երբեք չլքեն իրենց երկիրը:

Վերջում մասնաճյուղի տնօրեն Արմեն Խառատյանը շնորհակալություն հայտնեց միջոցառումը կազմակերպելու, աշակերտների մեջ հայեցի հոգեբանություն և հայրենասիրություն սերմանելու համար:

Սեպտեմբերի 1-ը Հայաստանի ազգային պոլիտեխնիկական համալսարանի Վանաձորի մասնաճյուղում տոնական էր: Գիտելիքի և Դպրության տոնին ՀԱՊՀ Վանաձորի մասնաճյուղն իր դռներն էր բացել  բակալավրի և մագիստրատուրայի առաջին կուրսեցիների, ավագ դպրոցի 10-րդ դասարանի աշակերտների համար: Հանդիպումն սկսվեց Պոլիտեխնիկի օրհներգով: Տոնական այս օրը ևս մեկ անգամ առիթ է տալիս կրթության գործընթացի բոլոր մասնակիցներին՝ աշակերտից մինչև տնօրեն, ասպիրանտից մինչև պրոֆեսոր` վերագնահատելու գիտելիքի կարևորությունն ինչպես յուրաքանչյուր անձի բարեկեցության, այնպես էլ պետության զարգացման ու հզորացման գործընթացում:

Գիտելիքի տոնի կապակցությամբ ուսանողներին շնորհավորեց ՀԱՊՀ Վանաձորի մասնաճյուղի տնօրեն Արմեն Խառատյանը. «Շնորհավորում ենք ձեզ Գիտելիքի և Դպրության օրվա առթիվ: Կրթված ու գիտակից սերունդը երկրի առաջընթացի առաջին երաշխիքն է, իսկ հաջողությունները կրթության ոլորտում՝ մեր երկրի կայացման կայուն հիմնաքարը: Դուք ընդունվել եք Հայաստանի հզորագույն ճյուղային կառուցվածք ունեցող ինժեներական բուհը: Մեր բուհը կրթական բարեփոխումների առաջնեկն է Հայաստանում, ուստի դուք ունեք լայն հնարավորություններ կերտելու ձեր ապագան և կարիերան»:

Ուսանողներին և աշակերտներին շնորհավորեցին նաև ավագ դպրոցի տնօրեն Արմեն Սիրադեղյանը, ավագ դպրոցի ուսումնադաստիարակչական աշխատանքների գծով փոխտնօրեն Հասմիկ Հովհաննիսյանը, Որակի ապահովման և վերահսկման բաժնի վարիչ Վահան Մամյանը, Արտաքին կապերի և ուսանողական կարիերայի համակարգող Տաթևիկ Մարգարյանը,  Ուսանողական խորհրդի նախագահ Դիանա Պետրոսյանը: Մասնաճյուղի տնօրենը, ավագ դպրոցի տնօրենը բարձր առաջադիմություն ցուցաբերած աշակերտներին հանձնեցին գովասանագրեր և մրցանակներ: Պարգևատրվեցին նաև «Կենգուրու 2017» մրցույթում, ԴիջիԿոդ կիրառական ծրագրավորման պատանեկան ամենամյա մրցույթում, «ՈԶՆԻ 2017» ամենամյա դպրոցական համակարգչային մրցույթում և «Մեղու» մրցույթում հաղթող աշակերտները:

Հուսով ենք, որ Պոլիտեխնիկի սաները կշարունակեն առանձնանալ իրենց տրամաբանական մտածողությամբ և ինժեներին հատուկ ունակությամբ:

Արտադրական պրակտիկայի շրջանակներում «Տեխնոլոգիաներ և ճյուղային տնտեսագիտություն» ֆակուլտետի ՇՇԻԿԱ մասնագիտության ՎՇՇ 411Բ  ակադեմիական խմբի ուսանողներն ամբիոնի վարիչ Ա.Գյուրջինյանի ղեկավարությամբ իրենց արտադրական պրակտիկան անցկացրին «Կանակա» ՓԲԸ–ի Տավուշի մարզի Հաղարծին համայնքի մոտ գտնվող վերակառուցվող կառույցում: Աշխղեկ Արսեն Խուդինյանը, ով նույն մասնագիտության մագիստրատուրայի շրջանավարտ է, մանրամասն և բովանդակալից բացատրեց շինարարական աշխատանքների կատարման տեխնոլոգիան: Անվտանգության կանոններին և նախագծերին ծանոթանալուց հետո ուսանողները հնարավորություն ստացան որոշ աշխատանքներ կատարել ինքնուրույն, գեոդեզիական չափումների օգնությամբ ճշտվեցին հիմքերի տեղադրման նիշերը:

Հատուկ շնորհակալություն ենք հայտնում ՀԱՊՀ Վանաձորի մասնաճյուղի տնօրենությանը՝ պրակտիկա կազմակերպելու հարցում օժանդակելու համար:

ՀԱՊՀ Վանաձորի մասնաճյուղի ուսանողները մայիսի 20-24-ը մասնակցեցին «Ֆինանսական նորարարություններ ազգային զարգացման համար» ֆորումին՝ «Իմ ֆինանսների ամիս» ծրագրի շրջանակներում, որը կազմակերպվել էր Եվրոպական երիտասարդական պառլամենտի և ՀՀ Կենտրոնական բանկի համագործակցությամբ: Ֆորումն անց էր կացվում անգլերենով, մասնակցում էին Երևանի և մարզերի բուհերից շուրջ 120 ուսանող, ովքեր 5 օրվա ընթացքում փորձելու էին գտնել բանաձևեր, լուծումներ ֆինանսական խնդիրների համար, ինչպես նաև առաջարկելու էին նորարարկան գաղափարներ՝ ոլորտի զարգացման համար: Հիմնական ուղղվածությունը կապված էր գյուղական համայնքների ֆինանսական իրազեկման զարգացման հետ, այսինքն՝ նպաստել մարդկանց ֆինանսապես ավելի իրազեկված լինելուն: 

Կազմվել էր 12 հանձնաժողով, ովքեր փորձելու էին գտնել ՀՀ Կենտրոնական բանկի կողմից առաջադրված 12 տարբեր ակտուալ խնդիրների լուծումներ: Խնդիրների շուրջ ուսանողների մշակած լուծումների համալիր փաթեթները կհանձնվեն ՀՀ Կենտրոնական Բանկին, ինչպես նաև՝ կներկայացվեն ԵԵՊ միջազգային գրասենյակին: Միջոցառման ընթացքում իրենց լավագույնս դրսևորած պատվիրակները հնարավորություն կստանան ներկայացնելու Հայաստանը միջազգային սեսիաներում: Հայաստանի Հանրապետության Կենտրոնական Բանկի կողմից նախաձեռնած «Իմ ֆինանսների ամիս» տարեկան ծրագրի նպատակն է հասարակության շրջանում անձնական ֆինանսների կառավարման կարևորումը և ֆինանսական կրթության մակարդակի բարձրացումը։ Վերջում լավագույն խմբերը պարգևատրվեցին մրցանակներով, որոնց շարքում տեղ էին զբաղեցնում նաև մեր ուսանողները:

Միջոցառումների շրջանակում Առնո Բաբաջանյանի համերգասրահում կազմակերպվեց համերգ, որտեղ փայլուն ելույթ ունեցավ Պոլիտեխնիկցի Մերի Արզումանյանը՝ Կոմիտասի «Գարուն» ստեղծագործությամբ:

ՀԱՊՀ Վանաձորի մասնաճյուղի «Տեխնոլոգիաներ և ճյուղային տնտեսագիտութուն» ֆակուլտետի «Մեքենաշինություն և նյութերի մշակում» ամբիոնի դասախոսներ Միշա Սարգսյանը, Էդուարդ Շահինյանը, ավագ լաբորանտ Էլյա Տիսինյանը և սույն ֆակուլտետի ուսանողներ ճանաչողական այց կատարեցին «ՌՈՒՍԱԼ ԱՐՄԵՆԱԼ» ՓԲԸ:

Ուսանողները գործարանում ծանոթացել են սննդամթերքի փաթեթավորման համար արտադրվող ալյումինե թիթեղի պատրաստման տեխնոլոգիական գործընթացին, այնուհետև այցելել են ձուլման արտադրամաս, ծանոթացել որակի հսկողության համակարգին:

Ուսանողների շրջանում հետաքրքրություն են առաջացրել    հատկապես δ=6,5×10^-3 մմ հաստություն ունեցող 10 տն զանգվածով  փաթույթների պատրաստումը և նորագույն գերմանական հաստոցները: Արդյունքում ուսանողները կարողացան ստանալ իրենց հետաքրքրող հարցերի պատասխանները, նաև տեղեկացան, թե ինչպես կարող են տեսական գիտելիքները կիրառել գործնականում:

Հատուկ շնորհակալություն ենք հայտնում «ՌՈՒՍԱԼ ԱՐՄԵՆԱԼ» ՓԲԸ-ի աշխատակազմին և ՀԱՊՀ Վանաձորի մասնաճյուղի տնօրենությանը՝ ճանաչողական այցը կազմակերպելու հարցում օժանդակելու համար:

Մայիսի 03-05-ը ՀԱՊՀ Վանաձորի մասնաճյուղում տեղի ունեցավ արդեն ավանդույթ դարձած ուսանողական տարեկան գիտաժողով, որը նվիրված էր Հայոց բանակի կազմավորման 25-ամյակին: Ներկայացվեց 83 ելույթ: Ողջույնի խոսքով հանդես եկավ մասնաճյուղի տնօրեն Արմեն Խառատյանը նշելով՝ պատահական չէ, որ գիտաժողովը նվիրված է Հայոց բանակի կազմավորման 25-ամյակին: Մասնաճյուղի 20 ուսանողներ ծառայել են սահմանային դիրքերում, մասնակցել ապրիլյան քառօրյա պատերազմին՝ հերոսաբար պաշտպանելով մեր հայրենիքը: Իսկապես անգնահատելի են մեր զինվորների քաջագործությունները: Գիտաժողովի մասնակիցները ծափողջյուններով մեծարեցին և հարգանքի տուրք մատուցեցին մերօրյա հերոս պոլիտեխնիկցիներին:

Գիտաժողովի առաջին լիագումար նիստին ներկայացվեց 3 ելույթ.

• Վանիչկա Ղազարյան. «Ղարաբաղյան քառօրյա պատերազմը. նոր սերունդ, նոր հերոսներ»: Ներկայացվեց քառօրյա պատերազմում տեղի ունեցած դեպքերը, հայ զինվորների անկոտրում պայքարը, ինչպես նաև այն 20 ուսանողների անունները, ովքեր հերոսաբար մասնակցել են քառօրյա պատերազմին: Պոլիտեխնիկն անմասն չի մնացել այդ գործին՝ փորձելով հնարավորինս օգնության հասնել սահմանում գտնվող հայ զինվորին:
• Էդիտա Հովհաննիսյան, Անժելա Հովհաննիսյան, Աստղիկ Միքայելյան. «Լոռու մարզի գյուղտեխնիկայի վարձակալության և սպասարկման կայանների ստեղծման ծրագիր»: Վանաձորի «ՉԻՆՎԱՆ» ՍՊԸ-ն առաջ է քաշել մի գաղափար, որի նպատակն է  Լոռու մարզում թիրախային 3 շրջաններում հիմնել գյուղտեխնիկայի վարձակալության և սպասարկման կայաններ, որոնք հնարավորություն կտան ֆերմերներին գյուղատնտեսական աշխատանքներն իրականացնել օգտագործելով համա­պատասխան գյուղտեխնիկա: Վանաձորի «ՉԻՆՎԱՆ» ՍՊԸ-ն  հիմք ունենա­լով Հայաստանի ազգա­յին պոլիտեխնիկական համալսարանի Վանաձորի մասնա­ճյուղի հետ անցած տարիների  համագործակցության փորձը,  առաջարկեց մասնաճյուղին մասնակ­­ցե­լու նա­խագծի իրականացման աշխատանքներին: Ստացված տվյալների հիման վրա ընտրված  տարածաշրջանների հա­մար` կախված ցանքատարածու­թյուն­ներից և մշակաբույ­սե­րի առանձնահատ­կություն­նե­րից, կատարվել է համապատասխան սարքավորումների ընտրություն, որոնք կնպաստեն գյուղատնտե­սա­կան աշխատանքների մեքենայացմանը և գյուղատնտեսական աշխատանք­ները կդարձնեն ավելի արդյու­նա­վետ: Ներկայումս նախագիծը ներկայացված է «Innovation Matching Grants» դրամա­շնորհային ծրագրի շրջանակներում` ֆինանսավորում ստանալու համար Աշխատանքային խմբի կողմից մշակված բիզնես պլանը գտնվում է գյուղնախարարու­թյունում, այն քննարկման փուլում է: ՀԱՊՀ Վանաձորի մասնաճյուղի համապատասխան մասնա­գիտական կրթություն ստացած շրջանավարտների համար  մեքենատրակտորային կայաններում աշխատելու հնարավորություն կստեղծվի:

• Մարգարիտա Մարուքյան. «Նոր մոտեցումներ աղացների մանրացնող բեռնվածքի դինամիկական պարամետրերի որոշման ուղղությամբ»: Ուսումնասիրվել է ռադիոազդանշանային եղանակների կիրառմամբ թրթռաղացներում մանրացնող մարմինների և մանրացվող նյութի բարդ ցիրկուլյացիոն շարժման օրինաչափությունների և մանրացնող մարմինների դինամիկական պարամետրերի մասին ինֆորմացիան, ինչը թույլ կտա ինտենսիֆիկացնել և բարելավել նյութերի մանրացման գործընթացը: Այս ուղղությամբ զգալի աշխատանքներ են կատարվել նաև մեր մասնաճյուղի «Տրանսպորտային համակարգեր» ամբիոնի աշխատակիցների կողմից: Մի շարք հավասարումներ և կախվածություններ են ստացվել, որոնք ընդլայնել են թրթռաղացների կիրառման շրջանակները, նախագծել, պատրաստել և ներդնել դրանք մի շարք ձեռնարկություններում, այդ թվում նաև Վանաձորի «ԳԻՊԿ» ՓԲԸ-ում և Ռուսաստանի Դաշնության Կալուգա քաղաքի «Տաշիր» ընկերությունների խմբի ձեռնարկությունում:

Մասնաճյուղի տնօրեն Արմեն Խառատյանը կարևորում է նման գիտաժողովների անցկացումը և´ բակալավրիատի, և´ մագիստրատուրայի ուսանողների համար, քանի որ դրանք կօգնեն հետագայում գիտահետազոտական աշխատանքներ կատարել, կնպաստեն, որ բուհի շրջանավարտները դառնան ստեղծագործող ճարտարագետներ:

Լավագույն աշխատանքների հեղինակները կխրախուսվեն: Միաժամանակ որոշվեց լրամշակումից հետո որոշ աշխատանքներ ներկայացնել տպագրության:

«Ինգո Արմենիա» ապահովագրական ընկերության Լոռու մարզի պատասխանատու Արման Աքուլյանը Երևանի իր գործընկերների հետ հանդիպում ունեցավ ՀԱՊՀ Վանաձորի մասնաճյուղի ուսանողների հետ: Հանդիպման ընթացքում ներկայացվեց պրեզենտացիա՝ «Ապահովագրություն, ապահովագրական գործակալ» թեմայով: Ուսանողները մանրամասն տեղեկացան ապահովագրական ընկերությունների, մատուցվող ծառայությունների և այլ հետաքրքիր փաստերի մասին: Հանդիպման նպատակն էր ուսանողներին ծանոթացնել գործակալի գործառույթների մասին, ինչպես նաև՝ համաձայնության դեպքում, ընդգրկել վերջիններիս ապահովագրական աշխատանքների մեջ: Խոսվեց նաև «Ինգո Արմենիա»-ի ապահովագրական դպրոցում անվճար սովորելու հնարավորության մասին:

Ուսանողներն իրենց հետաքրքրող հարցերն ուղղեցին  ապահովագրական ընկերության ներկայացուցիչներին, ովքեր հանգամանորեն պատասխանեցին նրանց բոլոր հարցերին:

Ուսանողներից շատերը համաձայնեցին ընդգրկվել գործակալի ծավալած աշխատանքներում և իրենց առաջին քայլերն անել՝ գումար վաստակելու համար:

ՀԱՊՀ Վանաձորի մասնաճյուղում տեղի ունեցավ «Էլի հայ ունենք» խորագրով միջոցառում՝ նվիրված Հայոց Մեծ Եղեռնի 102-րդ տարելիցին: Միջոցառումը կազմակերպել էր մասնաճյուղի ավագ դպրոցի ֆիզիկայի ուսուցչուհի Լուսինե Սարգսյանը, ով իր խոսքում նշեց.

-Այո՛, ցավով ենք հիշում, սակայն չենք մոռանում, որ այսօր, դարաշրջանի մարտահրավերներին դիմակայելու համար անհրաժեշտ է մաքրել արցունքները, անհրաժեշտ է, ոչ թե խնդրել, ոչ թե աղաչել, այլ բողոքի ձայն բարձրացնել, բարձրաձայնել մեր պահանջը, լինել հետևողական և համառ: Միջոցառման անվանումը «էլի հայ ունենք» պատահական չէ: Եվ այսօր, որպես մի հայ մարդ, ցանկանում եմ գալիք սերնդի մեջ ամրապնդել պահանջատիրոջ հոգեբանությունը, այլ ոչ կոտորվածի:

Աշակերտները ոչ միայն հիշեցին և հարգեցին 1915 թվականի անմեղ նահատակների հիշատակը, այլև ևս մեկ անգամ ի լուր աշխարհի լսելի դարձրին իրենց հոգու ճիչը: Եվ վստահ էին, որ յուրաքանչյուր հայի պահանջը կստիպի վերջապես ընդունել Հայոց Մեծ Եղեռնի միջազգային ճանաչումը և պատմական Հայաստանի վերամիավորումը: Դասղեկը և աշակերտները նկարահանել էին տեսաֆիլմ՝ Հայոց ցեղասպանության զոհերի հուշահամալիրում՝ Ծիծեռնակաբերդում, որտեղ ծաղիկներ դրեցին և իրենց սրտի խոսքն ասացին զոհերի հիշատակին:

Վերջում մասնաճյուղի տնօրեն Արմեն Խառատյանը շնորհակալություն հայտնեց միջոցառումը կազմակերպելու, աշակերտների մեջ հայեցի հոգեբանություն սերմանելու և մեր պատմությունը սերնդեսերունդ փոխանցելու համար: