Հայաստանի Ազգային Պոլիտեխնիկական Համալսարանի

ՀԱՊՀ Վանաձորի մասնաճյուղում փետրվարի 19-ին տեղի ունեցավ «Բաց լաբորատոր-2020» գիտահանրամատչելի  ակցիան: Այն աշխարհում լայնածավալ ամենամեծ գիտական ​​ակցիան է,  որն անցկացվում է մի շարք երկրներում: Այն ուղղված է ռուսական և համաշխարհային գիտության հանրայնացմանը: Հայաստանում այն անցկացվում է երեք քաղաքներում՝ Երևանում, Գյումրիում և Վանաձորում՝ Գյումրու Ռուսաստանի կրթության և մշակույթի  կենտրոնի և «Լուսավորչական նախագծերի լաբորատորիա» ոչ առևտրային կազմակերպության աջակցությամբ:

Ակցիային մասնակցում էին ՀԱՊՀ Վանաձորի մասնաճյուղի ավագ դպրոցի աշակերտներն ու ուսանողները, ինչպես նաև՝  մի շարք ավագ դպրոցների աշակերտներ և քոլեջների ուսանողներ:

Միջոցառման ավարտին բոլոր մասնակիցները ստացան հավաստագրեր, իսկ առաջին երեք տեղերն զբաղեցնող մասնակիցներին որպես պարգև տրվեցին վկայագրեր և գրքեր: Նշենք, որ առաջին երեք տեղերը զբաղեցրին ՀԱՊՀ Վանաձորի մասնաճյուղի ավագ դպրոցի աշակերտները:

Հատուկ շնորհակալագրով պարգևատրվեց ՀԱՊՀ Վանաձորի մասնաճյուղի տնօրեն տ.գ.թ., դոցենտ Արմեն Խառատյանը՝ նմանատիպ բազում միջոցառումներին և ակցիային մեծապես աջակցելու համար:

ՀԱՊՀ Վանաձորի մասնաճյուղը հյուրընկալեց «Դասավանդի՛ր Հայաստան» ծրագրի ներկայացուցիչներին, ովքեր ներկայացրին ծրագրի առաքելությունը, դիմելու կարգը և հետագա գործունեությունը։

Տարիների համագործակցության փորձը ցույց է տվել, որ Պոլիտեխնիկի շրջանավարտներն իսկապես առանձնացել են իրենց մասնագիտական որակներով, կարողություններով և ստեղծագործական ունակություններով: Նշենք, որ բացի դասավանդվող առարկաներից՝ ունակ են ղեկավարել նաև ռոբոտաշինական, ձեռնարկատիրական և այլ խմբակներ: 

Այս ծրագրի շրջանակներում ուսանողները հնարավորություն ունեն կերտելու իրենց կարիերան, դառնալու կայացած մասնագետներ, փայլուն առաջնորդական հմտություններով ուսուցիչներ: «Դասավանդի՛ր Հայաստան» ծրագիրը հավաքագրում և վերապատրաստում է համալսարանների շրջանավարտներին որպես ուսուցիչներ, այնուհետև երկու տարով գործուղում Հայաստանի մարզային դպրոցներ, որտեղ կա նրանց մասնագիտությամբ ուսուցիչների կարիք։ Ծրագրի առանձնահատկությունն այն է՝ պարտադիր չէ, որ մասնակիցը մասնագիտությամբ լինի մանկավարժ, միայն հարկավոր է ունենալ դասավանդելու և Հայաստանի զարգացմանը նպաստելու ցանկություն:

Հուսով ենք, որ ՀԱՊՀ Վանաձորի մասնաճյուղի ուսանողներն իրենց որոշակի ներդրումը կունենան այս ծրագրում՝ կիրառելով իրենց համալսարանական գիտելիքները:

Ռոտերդամ Հոգսքուլի Քաղաքաշինության բաժինը (Կիրառական Գիտությունների  Համալսարան) և ՀԱՊՀ Վանաձորի մասնաճյուղը իրենց բակալավրիատի դասընթացների համար նախընտրում են ICN Group-ի անդամ ICN Solutions-ի և ArchiDutch-ի  3D CAD-ի, մոդելավորման և վիրտուալ շինարարության փորձագիտությունը:

ICN Solutions-ի և ArchiDutch-ի փորձագիտության ներդրումը համալսարաններում ապահովում է ուսանողների և դասախոսների համար դասընթացներ՝  նախատեսված  գերժամանակակից ծրագրերի ուսուցման և BIM տեխնոլոգիաների կիրառման համար: Այս նպատակով կազմվել է տասնմեկ տարբեր դասընթացների համընդհանուր ծրագիր, որն ընդգրկում է բակալավրիատի առաջին երեք տարիները:

ICN Solutions-ի քաղաքաշինության և ՏՏ ոլորտի փորձագետները դասընթացի ամբողջ չորս տարիների ընթացքում ուսանողներին և դասախոսներին կաջակցեն գործնական առաջադրանքների  այսպես կոչված BIM Hub-ի շրջանակներում ։

Ամեն տարի շուրջ 100 ուսանող ավարտում է Հոգսքուլ Ռոտերդամի քաղաքաշինության բաժինը: Քաղինժեներները նախագծում, կազմակերպում և կառուցում են հանրային և ենթակառուցվածքային խոշոր աշխատանքների հիմնական մասը: Ապագայում քաղաքաշինական աշխատանքների մեծ կարիք կլինի՝ կլիմայական փոփոխություններից կախված: Հոլանդական ընկերություններն ու ինժեներները առաջատար են այս ոլորտում, և այդ պատճառով միջազգային նախագծերում մեծանում է նրանց ներգրավվածութունը :

Գիտելիքների և հմտությունների ասպարեզում առաջատար դիրքը պահելու նպատակով՝ Հոգսքուլ Ռոտերդամի  ուսանողները և դասախոսները մշտապես զբաղվում են ինքնազարգացմամբ՝  շնորհիվ ICN Solutions-ի կողմից պարբերաբար կազմակերպած դասընթացների։ Արդյունքում նրանք հմտանում են Autodesk Revit, Infraworks, Civil 3D-ի, Navisworks  և այլ ծրագրերի  կիրառման մեջ: Սա նրանց հնարավորություն է տալիս նախագծել վիրտուալ, կառուցել և օպտիմալացնել շինարարական և ենթակառուցվածքային աշխատանքներ` փաստացի և՛ շինարարությունից առաջ,  և՛ շինարարության ընթացքում: Այս դասընթացի կարևորագույն մաս են կազմում Autodesk BIM 360-ի, վիրտուալ և լրացված իրականության, ամպահիմք համագործակցության և 3D վիզուալիզացիայի (պատկերացում) վրա հիմնված առավել նորարարական տեխնիկական լուծումների և BIM տեխնոլոգիաների տիրապետումը: Հոգսքուլ Ռոտերդամի և ICN Solutions-ի համատեղ ուժերով քաղաքաշինության բաժնի բակալավրիատը ապահովում է այս ոլորտում ուսանողների և դասախոսների կրթության ավելի բարձր մակարդակ: Նրանք հնարավորություն են տալիս ուսանողներին գերազանցել նույնիսկ իրենք իրենց այժմ և հետագայում՝ որպես կայացած մասնագետներ:

ICN Group-ի անդամ ArchiDutch ընկերությունը արդեն մեկ տարի է, ինչ իրականացնում է տիպային կրթական ծրագիր ՀԱՊՀ Վանաձորի մասնաճյուղի       «Շինարարություն» մասնագիտության ոլորտում: Նախատեսվում է ծրագրային բարեփոխումներ նաև համալսարանի այլ հարակից ոլորտներում։ Դասընթացի նպատակն է հայ ուսանողներին փոխանցել միջազգային փորձ, եվրոպական շուկայում աշխատելու գիտելիքներ, BIM տեխնոլոգիաներին ծանոթացում և իրականացնել դրանց կիրառությունը նաև Հայաստանում։

ՀԱՊՀ Վանաձորի մասնաճյուղում «Ձեռնարկությունների տնտեսագիտություն և կառավարում» մասնագիտության երրորդ կուրսի ուսանողների հետ ներդրումների և նորամուծությունների կառավարում առարկայից տեղի ունեցավ գործարար խաղ «ՀԱՊՀ Վանաձորի մասնաճյուղի ուսանողների պահանջմունքների բավարարման համար` ներդրումային նախագծի մշակում» թեմայով։

Աշխատանքի հեղինակն էր դասախոս Արուսյակ Մադոյանը, ում խոսքերով, խաղի նպատակն էր ուսանողների մոտ ձևավորել թիմում աշխատելու ունակություն, հաղորդակցման հմտություն, սերմանել աշխատանքի նկատմամբ պատասխանատվություն, փոխօգնություն, նաև՝ տեսական գիտելիքների պրակտիկ կիրառություն։
Առանձնահատկությունն այն էր, որ բոլոր ուսանողներն ունեին համահավասար դեր` վերջնական արդյուք ստանալու մեջ, որն ընտրված էր իրենց խառնվածքը և նախասիրությունները հաշվի առնելով։

Ուսանողները, կատարելով հարցումներ, պարզել էին, որ Մասնաճյուղի ուսանողները կարիք ունեն արագ սննդի կետի, որից կարող են գնել թարմ և համեղ սնունդ։ Երկու թիմերն էլ նույն պահանջմունքի բավարարման համար ներկայացրել էին 2 միանգամայն տարբեր նախագծեր։ Առաջին թիմը ներկայացրել էր համալսարանի ներսի ճաշարանը շահագործելու նախագիծ, որը` բացի սննդի կետ լինելուց, նաև ուսանողներին առաջարկում է զանազան խաղեր, ինտերակտիվ ժամանց և օնլայն պատվերի հնարավորություն։
Երկրորդ թիմը առաջարկում էր շարժական արագ սննդի կետ, որը առանձնանում էր նմանատիպ նախագծերից սպասարկման մոտեցմամբ և ուտեստների նորարարական տեսականիով: Հիմնական առանձնահատկությունն այն էր, որ հերթերից խուսափելու համար սննդի կետը բաժանված էր 2 մասի, մեկը՝ ըմպելիքներ և քաղցրավենիք, մյուսը՝ տաք սնունդ։

Ամփոփելով կատարված աշխատանքը՝ ելույթ ունեցան ՀՃԱ իսկական անդամ, տ․գ․թ․ դոցենտ տնօրեն Արմեն Խառատյանը, տնտ․գ․թ․ դոցենտ ամբիոնի վարիչ Լուսինե Աղաբաբյանը, դասախոս Կալիպսե Մնացականյանը և Ասյա Հովհաննիսյանը, ովքեր նշեցին, որ նման թիմային աշխատանքները շատ կարևոր են մասնագիտական գիտեիքների խորացման համար, խոսեցին թեմայի արդիականության և ժամանակից պահանջներին համապատասխանության մասին։

Ավագ դպրոցների հետ համագործակցության պայմանագրի շրջանակներում՝ Վանաձորի թիվ 11 ավագ դպրոցի աշակերտներն այցելեցին ՀԱՊՀ Վանաձորի մասնաճյուղ՝ մասնագիտական կողմնորոշման նպատակով:

Աշակերտները շրջեցին տեխնիկապես գերհագեցած լաբորատորիաներով, ծանոթացան սարքավորումներին, այցելեցին ռոբոտաշինության, հեռահաղորդակցման և սարքավորումներով հագեցած լաբորատորիաներ: Մինչ լաբորատոր փորձեր կատարելը, արտաքին կապերի համակարգող Տաթևիկ Մարգարյանը աշակերտներին ներկայացրեց Պոլիտեխնիկի հնարավորությունները, գործընկերային կապերը, աշխատանքի տեղավորման հեռանկարները: Մեքենագիտության, ֆիզիկայի և էլեկտրատեխնիկայի լաբորատորիայում աշակերտներն ականատես եղան նորագույն սարքավորումների փորձերին: Ռոբոտաշինության լսարանում խմբակի վարիչ Արաքսյա Բալյանը աշակերտներին ծանոթացրեց ռոբոտաշինության խմբակի աշխատանքներին, աշակերտները ծանոթացան նաև «Ռոբոտեքս 2019»  միջազգային ռոբոտաշինական մրցույթին մասնակցած «Վալի» ռոբոտի և դրա գործունեության հետ:

Ավագ դպրոցի աշակերտները տեղեկատվական հանդիպման ընթացքում կարողացան ընդլայնել գիտելիքները ինժեներական ոլորտում, կողմնորոշվեցին, թե ինչպես ճիշտ օգտագործել իրենց ներուժը տվյալ ոլորտում: Վերջում այցելեցին Վանաձորի տեխնոլոգիական կենտրոն, այնտեղ տեղակայված ընկերություններ, որտեղ մեծամասամբ աշխատում են ՀԱՊՀ Վանաձորի մասնաճյուղի աշակերտները, ուսանողները և շրջանավարտները:

ՀԱՊՀ Վանաձորի մասնաճյուղում տեղի ունեցավ հանդիպում «ԱյԴի Բանկ» ՓԲԸ-ի ներկայացուցիչների հետ՝ նվիրված քարտային մշակույթին։

Ուսանողների համար կազմակերպված տեսական ու միաժամանակ կիրառական նշանակություն ունեցող դասախոսության ընթացքում ուսանողները ծանոթացան քարտերի ծագման պատմությանն ու դրանց կիրառելիությանը, դեբետային և կրեդիտային  վճարային քարտերի տարբերություններին։

Բանկի աշխատակիցները խոսեցին նաև Idram Rocket Visa քարտի մասին, որը մեծ հետաքրքրություն առաջացրեց բուհի ուսանողների շրջանում։ Ակտիվ հարց ու պատասխանից հետո, որի ընթացքում բանկի աշխատակիցները կիսվեցին նաև իրենց աշխատանքային փորձով, ուսանողները բանկի կողմից որպես նվեր ստացան Idram Rocket Visa քարտերը։ Բանկը նաև անակնկալ նվեր էր պատրաստել, որը բաժին հասավ մեկ  երջանիկի։

  Բուհը ողջունում է նմանատիպ նախաձեռնություններն ու նախատեսում է հետագայում ևս նմանատիպ այլ դասախոսություններ անցկացնել։ Շնորհակալություն ենք հայտնում  «ԱյԴի Բանկ» ՓԲԸ-ին՝ համագործակցության համար։

Գիտելիքի և դպրության տոնին ՀԱՊՀ Վանաձորի մասնաճյուղն իր դռներն էր բացել  բակալավրի և մագիստրատուրայի առաջին կուրսեցիների, ավագ դպրոցի 10-րդ դասարանի աշակերտների համար: Այսօր Պոլիտեխնիկում ազդարարվեց  ուսումնական տարվա սկիզբը, որը նաև գիտելիքներով հարստանալու, իրական արժեքներ ճանաչելու եւ նոր նպատակներ կյանքի կոչելու սկիզբ է: Առանձնակի ջերմությամբ շնորհավորեցինք բոլոր նրանց, ովքեր առաջին անգամ էին ոտք դնում ՀԱՊՀ Վանաձորի մասնաճյուղ: Հանդիպումն սկսվեց Պոլիտեխնիկի օրհներգով:

Գիտելիքի տոնի կապակցությամբ ուսանողներին շնորհավորեց ՀԱՊՀ Վանաձորի մասնաճյուղի տնօրեն Արմեն Խառատյանը. «Շնորհավորում ենք ձեզ Գիտելիքի և դպրության օրվա առթիվ: Տոնական այս օրը առիթ է տալիս կրթության գործընթացի բոլոր մասնակիցներին՝ աշակերտից մինչև տնօրեն, ասպիրանտից մինչև պրոֆեսոր` վերագնահատելու գիտելիքի կարևորությունն ինչպես յուրաքանչյուր անձի բարեկեցության, այնպես էլ պետության զարգացման ու հզորացման գործընթացում: Դուք ընդունվել եք Հայաստանի հզորագույն ճյուղային կառուցվածք ունեցող ինժեներական բուհը, որն ունի միջազգային հավատարմագրում: Մեր բուհը կրթական բարեփոխումների առաջնեկն է Հայաստանում, ուստի դուք ունեք լայն հնարավորություններ կերտելու ձեր ապագան և կարիերան»: 

Ուսանողներին և աշակերտներին շնորհավորեց  նաև Հայ-Թեք Գեթվեյ ընկերության Վանաձորի մասնաճյուղի տնօրեն, Պոլիտեխնիկի շրջանավարտ Սվետա Ջաղացպանյանը, ով ներկայացրեց իր հաջողության ուղին և ոգևորեց Պոլիտեխնիկի ուսանողներին լինել առաջադեմ, նպատակասլաց և հեռանկարային: Շնորհավորանքներին միացան ավագ դպրոցի տնօրեն Արմեն Սիրադեղյանը, ավագ դպրոցի փոխտնօրեն Հասմիկ Հովհաննիսյանը, ուսանողական խորհրդի նախագահ Տիգրան Գասպարյանը, Որակի ապահովման և արտաքին կապերի բաժնի ղեկավար Վահան Մամյանը:

Ավագ դպրոցի փոխտնօրենը բարձր առաջադիմություն ցուցաբերած աշակերտներին հանձնեց գովասանագրեր:

Միջոցառման ավարտից հետո Մասնաճյուղում մեկնարկեց 2019-2020 տարվա ուսումնական գործընթացը: 

Հայաստանի ազգային պոլիտեխնիկական համալսարանի Վանաձորի մասնաճյուղում տեղի ունեցավ 2018-2019 ուսումնական տարվա շրջանավարտների դիպլոմների հանձման հանդիսավոր արարողությունը: Մասնաճյուղը ճանապարհեց առկա և հեռակա համակարգում սովորող բակալավրի, մագիստրատուրայի 100-ից ավելի շրջանավարտների: Այս օրը առավել հանդիսավոր էր, քանի որ շրջանավարտներին իրենց դիլոմները հանձնեց Միջազգային համագործակցության և կրթական բարեփոխումների գծով պրոռեկտոր Ռուբեն Աղգաշյանը: 

Մասնաճյուղը թողարկում է մասնագետներ 10-ից ավելի մասնագիտությունների գծով, որոնք պահանջված մասնագիտություններ են ոչ միայն Հայաստանի աշխատաշուկայում, այլ նաև՝ արտերկրում: Բուհը ծավալում է իր գործունեությունը միջազգային գիտատեխնիկական չափորոշիչներին համապատասխան, ներմուծում է նոր մասնագիտություններ, ապահովում պրակտիկայի անցկացումները հայտնի ընկերություններում, ինչպես նաև՝ կազմակերպում բազմաթիվ գործատու-ուսանող հանդիպումներ, որի արդյունքում շատ ուսանողներ կարողանում են աշխատել իրենց մասնագիտությամբ:

Ուսանողներին ողջունեց և շնորհավորեց Մասնաճյուղի տնօրեն Արմեն Խառատյանը, Միջազգային համագործակցության և կրթական բարեփոխումների գծով պրոռեկտոր Ռուբեն Աղգաշյանը, ովքեր նշեցին, որ շրջանավարտներն ավարտում են Հայաստանի առաջատար տեխնոլոգիական բուհը։ Պոլիտեխնիկն այնպիսի մասնագիտություններով է օժտում իր սաներին, որոնք հարատև են, կենսական և մշտապես արդիական։ 

Ուսման տարիներին ուսանողները ձեռք են բերել ոչ միայն որակյալ գիտելիքների պաշար՝ աշխատաշուկայում մրցունակ լինելու համար, այլև օժտված են մարդկային, ազգային բարձր արժեքներով, որոնք շատ կարևոր են մեր հասարակության և պետականության կերտման հարցում։ Շրջանավարտներից մի քանիսը, ովքեր Մասնաճյուղի աջակցությամբ արդեն գործընկեր կազմակերպություններում իրենց մասնագիտությամբ  գտել են աշխատանք, շնորհակալություն հայտնեցին ուսումնական տարիների, ձեռք բերած գիտելիքների և փորձառության համար և խոստացան բարձր պահել պոլիտեխնիկցիների վեհ անունն ու արժանիքները:

Հունիսի 10-ին և 11-ին ՀԱՊՀ Վանաձորի մասնաճյուղում տեղի ունեցավ արդեն ավանդույթ դարձած ուսանողական տարեկան գիտաժողովը, որը նվիրված էր Վանաձորի մասնաճյուղի հիմնադրման 60-ամյակին:

Հոբելյանական պլենար նիստում ընդգրկված էին գործընկեր կազմակերպություններում աշխատող մեր ուսանողների զեկույցները՝ ընկերությունների տնօրենների ղեկավարությամբ, որն ընդգծում էր բուհ-գործատու սերտ կապը և արդյունավետությունը:

Գիտաժողովին ներկայացվեց 47 ելույթ: Ողջույնի խոսքով հանդես եկավ մասնաճյուղի տնօրեն Արմեն Խառատյանը, նշելով, որ Մասնաճյուղի հիմնադրումը կենսական կարևորություն է ունեցել Լոռու մարզի տնտեսական զարգացման հարցում: Պոլիտեխնիկը այն հիմնական սնուցող զարկերակն է, որը տարածաշրջանին ապահովում է ժամանակակից ճարտարագետներով:

Գիտաժողովի առաջին լիագումար նիստին ներկայացվեց 4 ելույթ.

• Անժելա Ազարյան. «Մաքառումների և հաղթանակների 60-ամյա ուղի», որտեղ ամփոփված էր Մասնաճյուղի ամբողջ պատմությունը:
• Սարգիս Հակոբջանյան. «Գրավիր նոր բարձունքներ Արդեսկ և Արխիդաչ ընկերությունների հետ»:
• Անժելա Հովհաննիսյան, Աստղիկ Առաքելյան. «Ագրոտեխնոպարկի ստեղծումն իբրև գյուղատնտեսության ոլորտում տնտեսական հեղափոխության խթան»:
• Աշխեն Ամիրխանյան. IօT(Internet of Things) համակարգեր

Հետաքրքիր թեմաներ էին սպասվում նաև առանձին սեկցիաներում:

Շնորհակալություն ենք հայտնում Ախիդաչ և Արդեսկ, Հայթեք Գեթվեյ ընկերություններին՝ իրենց մասնակցության և համագործակցության համար: Պոլիտեխնիկն ունի համագործակցության լայն շրջանակ, որի շնորհիվ ուսանողներն ու շրջանավարտները հեշտությամբ կարողանում են աշխատանքի անցնել գործընկեր կազմակերպություններում:

Մասնաճյուղի տնօրեն Արմեն Խառատյանը կարևորում է նման գիտաժողովների անցկացումը և´ բակալավրիատի, և´ մագիստրատուրայի ուսանողների համար, քանի որ դրանք օգնում են հետագայում գիտահետազոտական աշխատանքներ կատարել, նպաստում են, որ բուհի շրջանավարտները դառնան ստեղծագործող ճարտարագետներ:

Լավագույն աշխատանքները կներկայացվեն տպագրության:

ՀԱՊՀ Վանաձորի մասնաճյուղի ավագ դպրոցի Արմաթ ինժեներական լաբորատորիայի սաները՝ իրենց ղեկավար Արաքսյա Բալյանի հետ, ՀԱՊՀ ղեկավարության աջակցությամբ, հնարավորություն ստացան այցելելու Հայաստանի ազգային ճարտարագիտական լաբորատորիաներ։ ՀԱՃԼ-ում նրանք ունկնդրեցին «Ո՞վ է ինժեները» թեմայով դասախոսությունը և մասնակցեցին էլեկտրատեխնիկայի գործնական դասընթացին, որը վարեց Հայաստանի ազգային ճարտարագիտական լաբորատորիաների աշխատակցուհի Ազատուհի Ուլիկյանը։ Շուրջ 2 ժամ տևած ինտերակտիվ դասախոսության ընթացքում աշակերտները քննարկեցին ինժեներությանը վերաբերող բազմապիսի հարցեր։ Նրանք տեղեկացվեցին, որ գոյություն ունի մոտ 200 տիպի ինժեներություն՝ սկսած քիմիկ ինժեներից, մեխանիկ ինժեներից, վերջացրած ռազմածովային, ավիատիեզերական ինժեներներով։

Դասընթացից հետո աշակերտներն աշխատեցին ՀԱՃԼ-ի ռոբոտներով, ծանոթացան նրանց աշխատանքի սկզբունքներին և ծրագրային ապահովմանը։ Այնուհետև նրանք շրջայց կատարեցին ՀԱՃԼ-ի ճշգրիտ չափումների և սխեմատեխնիկայի գիտահետազոտական լաբորատորիաներում, ծանոթացան ուսանողների գիտական նախագծերին։

Աշակերտները մեծ հետաքրքրությամբ էին ուսումնասիրում ՀԱՊՀ ուսանողների ստեղծած խելացի ջերմոցի, խելացի տան, Cartbot-ի, Cub-ի, խելացի շախմատի և այլ նախագծերի կառուցվածքները։

Օրվա երկրորդ կեսին աշակերտներին առաջորդեցին ՀԱՊՀ օդային ռոբոտատեխնիկայի ուսումնական կենտրոն, որտեղ նրանք դարձյալ հետաքրքիր դասախոսություն լսեցին տարբեր անօդաչու թռչող սարքերի մասին, իսկ վերջում՝ աշխատեցին անօդաչու թռչող սարքի հետ։

Տեղկատվությամբ հագեցած օրվա վերջում աշակերտները գնացին Վոլտերման ֆիրմա, ուր ծանոթացան հայկական ապրանքանիշ հանդիսացող խելացի դրամապանակի ստեղծողների հետ։ Այստեղ նույնպես մեծ էր նրանց ոգևորությունը, քանի որ հասկացան, որ ընդամենը 2 տարում կարելի է կյանքի կոչել ամենաանհավանական թվացող ցանկացած նորարարական գաղափար, միայն պետք է աշխատել և սովորել։

Շնորհակալության բոլոր մասնագետներին և ՀԱՊՀ Վանաձորի մասնաճյուղի տնօրինությանը՝ աշակերտների օրն ավելի արդյունավետ և հետաքրքիր դարձնելու համար։